Duha ka gidudahang kawatan gipatay

CEBU, Philippines - Maayong pagkabuslot sa ulo sa usa ka lalaking gituohang kawatan human kini gipusil pasado alas- 8 kagahapon sa buntag diha sa Newtown sa barangay Pardo sa dakbayan sa Sugbo.

Ang biktima nailhan sa ngalang Jonathan Ocarisa, 22, molupyo sa maong barangay kinsa nakaangkon og samad pinusilan sa iyang bukton ug ulo.

Matud pa sa usa ka Jenny Pugoya nga nianang pagkagabii aduna siya’y nadunggang unom nga nagsunod nga  buto sa armas.

Ang 15-anyos nga anak ni Pugoya kinsa gisugo sa pagpanguha og kahoy nianang pagkabuntag diha sa kalibonan maoy nakakita sa patay’ng lawas ni Ocarisa.

Si Pugoya mao nay mipahibalo sa gwardiya sa maong subdivision kabahin sa patay’ng lawas, ang gwardiya mitawag usab dayon sa kapolisan bahin niini. Dako ang pagtuo sa kapolisan nga kawatan ang biktima kini human usab narekober ang usa ka electric fuse box dili layo gikan sa iyang patay’ng lawas.

Matud pa ni PO1 Jerrick Samosa sa Homicide Section ilaha karong subayon ang background ni Ocarisa.

Samtang usa usab ka gidudahang kawatan og manok ang gikulata ug gipusil patay sa mga residente diha sa Barangay Upper Tunghaan, lungsod sa Minglanilla kagahapon sa kaadlawon.

Giila sa kapulisan ang biktima na si Rene Campos, 36, dunay kapuyo ug taga-Barangay Sudlon, dakbayan sa Sugbo.

Base sa imbestigasyon sa Minglanilla Police, nakadawat sila og taho kabahin sa biktima nga gi-ayo og kulata sa mga residente alas -4 gahapon sa kaadlawon.

Apan sa pag-abot sa mirespondeng kapulisan nakit-an nila ang biktima nga nagbuy-od na ug dunay daghang bun-og sa nagkadaiyang parte sa kalawasan ug nagkadugo tungod sa samad pinusilan sa iyang paa.

Matud pa nga gisitar sa mga residente ang biktima tungod kay kadudahan kaayo ang lihok niini ug kun nganong naabot kini sa maong lugar.

Sumala pa nga gisitar kini kung unsa ang sulod sa iyang knapsack ug dihang nahibaw-ang manok igtatari ang sulod niini gitabangan kini dayon og kulata  sa mga tawo.

Wala’y nadakpan ang kapolisan nga responsable  nga mga tawong nagbutang sa ilang mga kamot sa balaod tungod kay pulos nangambot ang mga residente.

Hinuon gipaabot sa kapolisan nga pipila ka adlaw gikan karon dunay mogawas nga mga impormasyon kun si kinsa ang mga tawong nagbanos-banos og kulata sa biktima nga maoy ilang pasakaan og kasong pagpatay.

Gidala ang biktima sa Minglanilla District Hospital ug namatay ra usab wala madugay.

Ang kapuyo sa biktima nga si Emelda dela Cruz mibutyag sa kapulisan nga ang iyahang nasayran nga ang kapuyo mamalitay og manok ug dili kawatan.

Apan ang kapulisan nagtuo nga nangawat gyud si Campos, human narekober gikan niini ang mga manok  nga gi-claim ra usab sa mga tag-iya nianang pagkabuntag. (BANAT NEWS)