Gipusposan hangtud namatay tungod kay maoy kun mahubog

CEBU, Philippines - Gitabangan og patay pinaagi sa pagbunalbunal og tubo sa ulo sa ugangan ug bayaw ang 25- anyos nga lalaki nga giingong magmaoy kun mahubog dihang nanghagis na usab kini  sa iyang kapuyo ug anak didto sa bukirang bahin sa barangay Ablayan sa lungsod sa Dalaguete niadtong Sabado sa alas 6:00 sa gabii.

Ang biktima nga daw mananap nga gitabangan og puspos hangtud namatay mao si Robert Cadenas, 25, lumad nga taga Surigao City apan anaa na magpuyo sa maong lugar diin magpuyo ang iyang kapuyo. Samtang ang mga suspek mao sila si Rufino Gesim, 56, amahan sa kapuyo sa biktima ug ang  anak niini nga si Raul Gesim, 25, ug igsoon sa kapuyo sa biktima.

 Matud ni SPO1 Veronico Centino sa Dalaguete Police Station dihang nahinabi sa Banat News ang biktima hubog nga nauli sa ilaha ug nanghagis ug  gihasi og maayo sa iyang kapuyo ug anak.

Ang suspek nga si Raul nga diha niadtong tungura ug gibadlong ang biktima apan gikatahong nasuko kini ug mikuha og kutsilyo ug gidunggab ang bayaw  apan nasagang kini ug kamot lang ang nasamad.

Apan dihang nakit-an ni Rufino iyahang giduol ang biktima ug gimaymayan apan nasuko gihapon kini ug mao na usab ang iyang gidunggab hinungdan sa pagkasamad sa tiguwang diha sa agtang.

Inay nga mopatuo, sumala pa nga mas misamot og kasuko ang biktima ug nanghagis, tungod kay armado man kini og kutsilyo mikuha og tubo ang manag-amahan ug dihang nalipat gipusposan nila ang agtang niini.

Bisan natumba na ang biktima  giusban gihapon kini sa pagpuspos diha sa liog hinungdan sa pagkirig  niini ug  patay na dihang naabtan sa mga mirespondeng polis.

Ang amahan ug anak nga suspek boluntaryong mitahan sa ilang kaugalingon  ug gitakdang pasakaan og tukmang sumbong. (BANAT NEWS)