Masuso gilumsan gilubong sa inahan

CEBU, Philippines - Usa ka masuso ang gilubong nga buhi kilid sa ilang pinuy-anan sa iyaha mismong 29-anyos nga inahan pipila ka oras human niya kini gipanganak didto sa barangay Balud lungsod sa San Fernando niadtong miaging Biyernes sa hapon.

Apan niadto lang Miyerkules sa hapon gidakop sa kapulisan ang inahan nga si Jackielyn Soronio, 29 anyos, dalaga, way trabaho ug nagpuyo sa maong lugar human nadiskobrehan sa mga silingan ang tiil sa bata nga migimaw sa yuta maong ilaha dayung gi-report sa kapulisan.

Matud ni PO1 Mary Jean Estrera sa Womens and Childrens’ Protection Desk sa San Fernando Police Station nga nahinabi sa Banat News  usa ka concerned citizen ang nidangop sa ilang buhatan alas 2:50 sa hapon niadtong adlaw nga Miyerkules bahin sa ilang nakit-ang tiil sa bata nga migimaw sa yuta.

Sa pagsusi sa kapolisan sa dapit ilang gidala ang municipal assistant health officer nga si Dr. Joseph Chu human ang unang report nga ilang nadawat naglihok lihok pa ang tiil nga nigimaw nga gilubong sa yuta.

Didto nipahigayon dayon ang kapulisan og hot pursuit operation sa inahan nga didto sa lungsod niadtong tungura ug ilahang gidala sa buhatan alang sa pagsukitsukit.

Usa ka 12-anyos nga batang babaye nagpuyo sa maong lugar maoy giingong nakakita nga nagkawot sa yuta ang maong babaye niadtong Biyernes. Ang inahan niangkon sa kapolisan nga Biyernes sa buntag kini nanganak nga nag-inusara ra siya sud sa balay. Matud pa niini, gisawod pa niya sa arenola nga puno sa tubig ang bata ug pagkahapon niya kini gilubong dihang walay tawo nga iyang nakita sa gawas.

Gibutyag ni Estrera nga mismong ang mga silingan nakamatikod nga mabdos kini apan nasayod silang wala kini bana, dugang nakapahibulong kanila panalagsa lang nila kini makit-ang mogawas sa balay.

Matud ni Estrera duna gyuy dautang plano si Soronio sa iyang gisabak tungod kay gikan sa pagsabak hangtud sa pagpanganak niini wala gyud kini magpahibawo sa iyang pamilya.

Ang suspek nabalhog na karun sa karsel samtang gihikay pa ang kasong infanticide nga ipasaka batok niini.

Dugang ni Estrera sa dugang pangutana nila niini igo lang kining motubag nga wala siya makahibawo kun buhi ba o patay ang iyang anak dihang iyaha kining gilubong   sa ilang tugkaran.

Ang maong insidente nisunod sa panghitabo didto sa lungsod sa Badian diin namatay ang laing masuso nga gianak sa inahan samtang sakay og traysikad padung unta sa district hospital, apan nalahos ang bata sa karsada ug naguroy hinungdan sa kamatayon niini. (Darrel A. Carumba/EIM) (BANAT NEWS)