Holcim Galing Mason Award gilusad

CEBU, Philippines - Gihatagan  og  gibug-aton  sa  usa  ka  pribadong kompaniya ang  pagpaila  sa  industriya  sa masonry  ug  sa  mga  tawong  mason  pinaagi  sa paghatag  niini  og  award.

Kini pinaagi sa paglusad    sa usa ka proyekto  nga  gitawag  nga  Holcim Galing  Mason  Awards  alang  niadtong  anaa  sa  trabaho  sa pagka-mason.

Ang  trabaho  nga  masonry   mao  ang    paglahugay  sa semento  bas o graba  ug  tubig,  ngadto  sa pag-apply  niini  sa sementohon  nga  lugar ug  kaha  sa  pagtaod  sa tiles.

Sa  tulumanon  AGIO  Forum nga  gipahigayon  didto  sa  Café  Laguna  and  Restaurant  kagahapon,  nga gipalanog  sa DYMR, si Nicki  Viriña,  sa  Holcim Philippines  Inc. miingon  nga  ang  kamot  sa mason  dako  kaayo  og  gikatampo sa construction industry  sa kalibotan.

Miingon  siya  nga  ang tanang  nanubo  murag  uhong  nga  mga  building  kon  edipisyo  sa nagkalainlaing  bahin  sa kalibotan ,  mugna  sa mga  kamot  sa mason.

Apan  matud  pa  ni Michael  Cabalda, hepe  sa sustainable development  group  sa Holcim,  nga   wala  pay  mga  kompaniya  o  bisan  ang  kagamhanan walay  programa  nga  naghatag og  gibug-aton  aron  mahimong  mainila  sa katilingban  ang  abilidad  sa usa  ka tawo nga  mason.

Gumikan  niini  dihang  nakita  sa tagdumala  sa Holcim  ang  ka-importante  sa maong  talento   nakig-uban  sila  sa  Technical Education and Skills  Development  Authority (TESDA)  sa pagpasiugda  sa usa  ka  programa  sa paghatag  og  award  niadtong  mga  tawo   nga  may   skill  kon  hiantigohan  ning  maong  matang  sa trabaho.

Ang  TESDA  maoy  gihatagan  og  katungod  sa  paghatag  og  national  certificate (NC)  sa mga  mason  nga  mopasar  sa  eksamin  nga ihatag  kanila. Ang  assessor  usab  sa TESDA  maoy  motan-aw  sa agi  sa mga  mason  nga  hatagan  og  eksamin  segun  sa  ilang  agi  sa  pagmasa  sa   semento  ngadto  sa pag-apply  niini   sa sementohon  nga  lugar   hangtud  sa pag-finish  niini.

Ang  maong  trabaho  sayon  tan-awon  apan  lisud  pangitaon  kadtong  mga  tawo  nga  may  katakus  sa  pagbuhat  niini.

Ang  Holcim  nga  nag-una  nga  supplier  sa semento, aggregates, aspalto   sa nasud  nakahatag  na  og  award  sa lima  ka  tawo  sukad  sugdi  ang  maong  programa  niadtong  tuig  2007 kansang  mananaog  mao  ang  taga Minglanilla,  Cebu  nga  si Sergio  Barliso,  gisundan  ni Rodante Andres  sa  Capiz  sa tuig 2009,  sa tuig 2011  ang  mananaog  giila  nga  sila  sa Eduardo Latap sa National Capital  Region,  ug Alejandro Tagle sa Cagayan  Valley.

Gani  giawhag  ni Viriña  kadtong  mga  trabahante  sa  mason  nga  angay mopahimus  niini  pinaagi  sa pagsalmot  sa Holcim  Galing  Mason  Award  kansang  deadline  sa pagdawat  sa aplikasyon  mao  ang  Agusto 16, 2013  sa alas 5:00  sa hapon  sa buhatan  sa TESDA  diin  kuhaa  ang  application form. (BANAT NEWS)