FISECA pakupton og armas de fuego

CEBU, Philippines - Giplanohang pahupton  og  armas de fuego ang mga piniling sakop sa Fishermen Sea and Ecological Care (FISECA) matud ni Konsehal Antonio Bacaltos, Jr. chairman sa committee on environment sa konseho  sa dakbayan  sa Talisay.

Ang maong plano ni Bacaltos  nahimo  gumikan  sa kaagresibo  sa ubang  mga  mananagat  sa paggamit  og dinamita didto sa Lagundi Reef sa barangay Poblacion sa maong  dakbayan.

Si Bacaltos nga nahinabi sa mga tigbalita kagahapon nagkanayon nga nakadawat siya og report nga ang mga sakop sa FISECA giingong mahadlok   sa paggukod  sa  mga  dinamitiro  nga armado  ilabi  na  kun  pabuthan    sila  sa armas  niini.

Matud niya nga kung tugotan,  naglaraw siya nga  magpili og mga sakop sa FISECA nga pahupton og armas apan ipaubos sila sa pagbansay-bansay.

Kun   magpatrolya  sa kadagatan sa Talisay kinahanglan adunay kuyog nga polis.

Bahin sa mga  dinamitiro  sa Lagundi Reef,  si Bacaltos  mibahad  nga  iya  kining  imbistigahon  ug  pasakaan  og  kaso  kadtong  sad-an.

Midugang  siya  nga  mangayo  siya  og  tabang  ni Konsehal Danny Caballero,  kinsa  maoy chairman sa committee on peace and order  bahin  sa maong  problema.

Kahinumdoman nga si Alfie Fernandez, bise presidente sa Sea Knights mibutyag  nga ang suspetsadong  dinamitiro   sa Lagundi, taga barangay Tanke, apan gipugngan  una  ang  ngalan  niini.

Sa laing bahin si Bacaltos mihangyo   usab  sa kagamhanan sa siyudad   nga  kun  mahimo  hatagan  og  sakyanan  nga 18 horse power   ang mga sakop sa FISECA .

Kini  aron  dali  nilang  hiapsan  sa  ginukdanay  ang  mga  dinamitiro  ug  uban  pang  illegal  nga  mananagat  sa Talisay. Si Caballero ug Bise Mayor Villarante migasto  sa kaugalingon  nilang  kuwarta nga  gipatukod    sa  guard house nga ibutang  sa Lagundi ug butangan kini og sakop sa FISECA nga magbantay batok sa ilegal nga mananagat.

Sa laing bahin usab, si Bacaltos  mibutyag nga  mireklamo  na  ang gagmay  nga  mananagat  tungod  kay  dyutay  na lang  kini  og  makuhang  isda  kay  hutdon  man sa  mga  langyaw  o  di Talisaynon  nga  mananagat.

Miingon  siya  nga  gusto  niyang mahanaw  kining  maong  mga  mananagat. (BANAT NEWS)