Taga Duljo-Fatima mihandos og petisyon

CEBU, Philippines - Nangayo  og  clearance  kagahapon gikan  sa barangay  hall  ang  mga  benepisyaryo sa Free Patent Law o RA10023  sa  barangay Duljo-Fatima  aron  ikapahigayon  ang  re-blocking  alang  sa access road  sa ilang   gipuy-an.

Ang  petisyon  kalabot  niini  ilang  giduso  ngadto   kang  barangay kapitan Elmer  Abella kagahapon  sa buntag

Si Eduardo Abella, presidente  sa  Duljo Integrated Neighborhood Association Inc. (DINAI)  nagkanayon  nga kaniadto  pang  Agusto 19, 2011 gilig-on  sa Department of Environment  and Natural  Resources (DENR) ang ilang subdivision  plan.

Apan  wala mohatag  si  kapitan  Abella  og  clearance  alang  niini,  hinungdan  nga  migama  sila og  petisyon  aron  matuman  ang  subdivision  plan  diin  kompleto  ang  mga  access  road.

Matud  pa  ni  Abella  nga  mikapin  na  sa 10  ka tuig  nga nag-antos  ang  maong  pundok  nga way  klarong  agianan  ang  ilang  lugar.

Gisaysay  ni  Abella  sa ilang  petisyon nga  maglisud  na  sila  sa paglabay  sa ilang  basura  kay walay  mohakot  nga  sakyanan  sa barangay  niini  kay  walay  agianan.

Ang DINAI  may  800  kapin  ka  pamilyang  sakop  nga  nagpuyo  sa yuta  sa kagamhanan  nga  gihatag  niini isip  socialized  housing site.

Midugang  si  Abella nga  nabahin  ang  maong  mga  membro  sa pito  ka  mga  home owners  association kinsa  mipasabot  nga andam  sila  pagpaguba  sa ilang  balay  nga  nahimutang  sa dalan  o access road  base  sa ilang  subdivision  plan.

Samtang  kadtong  maigo  sa 3 meter  legal easement, hatagan  sa Panagtambayayong Inc.  og  gagmay  nga  payag. Giingon  ni  Abella  nga  kapin  sa 100  ka  pamilya  ang  apektado  niini nga  anaa  sa  sitio Bohol Village, sa Duljo-Fatima.

Isunod  usab  niini  kadtong  apektado  sa maong  mga  access road  sa  sitio San Pedro -Panaghiusa,  Buli,  Plastikan  ug  uban pang  kasikbit  nga  sitio, sumala  ni  Abella. (/WC)  (BANAT NEWS)