Kamatayon sa tomboy hapit na masulbad

CEBU, Philippines - Hapit  na  masulbad  ang  krimin  sa  pagpatay  sa  usa ka  tomboy  nga napalgan sa kasagbotan   duol sa Mabolo Police Station niadtong Sabado sa kaadlawon.

Si Quennie Marie Arriesgado,19, molupyo sa barangay Luz  giingong gipahimuslan una  kini patya  sa wala pa   ilhing  kriminal.

Ang hepe sa kapolisa sa City Intelligence Branch  nga  si Chief Insp. Romeo Santander, mipadayag nga nakig-alayon   na kanila ang mga sakop sa Homicide Section ug Mabolo Police   Station kini aron madali ang kasulbaran sa maong kaso.

Matud  ni Santander nga aduna na sila’y  gisubay  nga tawo  nga  responsabli sa kamatayon sa biktima apan ila pa  kining  gisusi.

Dako ang pagduda ni Santander  nga posibling gitabangan  og  lugos  sa gang  ang biktima apan ila pa usab kini nga ipasuta og mga eksperto.

Sa gihimong awtopsiya ni Dr. Nestor Sator sa PNP Regional Crime Laboratory 7, nasuta   nga gihikogan  ang biktima tungod usab kay adunay marka   sa hikot  sa iyang liog.

Dugang pa ni Satur nga   may pangus sa nawong ang biktima, gawas niini  gisi ang  hymen   sa iyang  kinatawo  timailhan nga gipahimuslan gyud ang biktima sa  wala pa patya.

Kahinumdoman nga niadtong Sabado sa kadlawon napalgan ang patay’ng lawas sa biktima   sa kasagbotan sa dalan J. Luna barangay Mabolo.

Gani, ang conductor sa PUJ nga si Ramil Noynay maoy nakakita  sa biktima dihang mitubag siya sa sugo sa lawas   kay  misiwil  ang  tiil  niini.

Sa pagsusi sa kapolisan gihuboan  na  sa  ubos nga sapot  ang biktima ug nagkadugo na ang kinatawo niini. (WC) (BANAT NEWS)