Drug pusher gipusil patay

CEBU, Philippines - Gipusil patay sa wala pa matumbok nga mamumuno ang   usa  ka  ulitawo nga gituohang  illegal  drug  pusher   didto sa Sitio Lower Sun-ok, barangay Ibabaw, lungsod sa Cordova sa miaging gabii.

Ang biktima mao si Joseph Dizon alyas Waray, 29, ulitawo, lumad nga taga Eastern Samar ug nagpuyo sa maong lugar.

Si SPO3 Roel Dinoy sa operations branch sa Cebu Police Provincial Office (CPPO) miingon  nga ang biktima naglakaw  gikan sa iyang gipuy-an paingon sa gawas   sa  highway.

Wa makabantay ang biktima nga gisunod sunoran kini  sa kriminal  nga wala  hiilhi.

Pag-abot sa  Lower Sun-ok  gipusil kini ug nabatian na lang sa mga molupyo sa maong lugar ang sunod sunod nga buto sa armas.      

Paglabay sa pipila ka gutlo   gisusi   sa  mga molupyo   ug didto nakita nila  ang biktima nga nag-ubo  sa yuta.

Nakita nila  ang  mga samad  niini  sa buko-buko  samtang  nagsirit  ang  daghang  dugo  nga  mibanaw  sa yuta   ug  ang  biktima   wala  nay  kinabuhi.

Ang mga polis  nga  mirespondi  nakapunit  og  usa ka   kabhang sa bala sa kalibre .45 ug cell phone nga gipanag-iya  sa biktima.

Samtang laing napunitan   sa kapolisan  mao  ang   upat ka putos   nga shabu   didto  sa pitaka sa biktima.

Ang   anggulo sa illegal nga drugas   maoy gitumbok ug gitutokan karon sa kapolisan  nga motibo sa nagpadayong imbistigasyon.

Kini  tungod  kay  gidungog   sa  maong  lugar ang biktima nga tigbaligya og gidiling drugas. (BANAT NEWS)