Mandauehanon gidasig makighiusa kang Mayor Cortes

CEBU, Philippines - Gidasig  ni  Mandaue City Mayor  Jonas Cortes  ang   taga  Mandaue   sa  pakighiusa  kaniya ning  katapusan  niyang  termino  isip mayor  sa maong  dakbayan. 

Sa  iyang  pagpamulong  sa ika-47 nga kasumaran  sa adlaw  niyang  natawhan  sa miaging  ‘Sabado  sa gabii,  si Cortes  mapasalamaton  kaayo  sa  taga  dakbayan  sa Mandaue.

Iyang  gipakita  ang kahimtang  karon sa dakbayan  nga  dili  na  basta-basta,  kundi  usa  na  ka  inila  nga  dakbayan  sa nasud.

Matud  niya  nga  gikawilihan  kini  sa  mga magpapatigayon  sa  nasud  ug  sa gawas , kinsa  nagtinguha  nga  labi  silang  molambo  kun  anhi  sila sa Mandaue  mamatigayon.

Ang  maong  kasaulogan  nga  gipahigayon  didto  sa J Mall Center,  sa maong  dakbayan,  gitambongan  ni  Bise  Gobernador  Agnes  Magpale  ug  ni  Mayor  Adelino  Sitoy  sa lungsod  sa Cordova.

Gawas  sa  maong  mga  tinamod  nga  mga  opisyal, ang  tanang  opisyal  ug  mga kawani  sa dakbayan  miduyog  sa kalipay  sa mayor  sa maong  higayon. 

Si  Magpale  sa  iyang  bahin  midayeg  siya  sa mga kalamboan  sa dakbayan  pinaagi sa pagpanguna  ni  Cortes.

Gawas  nga  nagpasalamat  siya nga  nakatampo  kaayo  og  dako  ang taga  Mandaue  sa iyang  pagka-bise  gobernador,  si Magpale  nagkanayon  nga  angay nga  hugopan  sa tanan  ang  mga  gidamgo  pa sa mayor  nga dugang  kalamboan  sa siyudad.

Miingon  si Magpale  nga   dako  siya  og  nahimong utang  kabubut-on  kang  Cortes  kinsa  usa  sa mihatag  kaniya og  ayuda  aron  labing  mopaluyo  ang  katawhan  sa pagpili  kaniya  nga  mahimong  bise  gobernador sa lalawigan  sa Sugbo.

Samtang  si  Cortes    miingon  nga  ang  iyang  kalipay  mao  nga  hiusahan  siya  sa katawhan  sa Mandaue  sa  iyang  mga  plano aron labi pang  molipang  ang  mga  proyekto  alang sa panginabuhi.

Ang  edukasyon  sa  kabataan  ug panglawas  sa katawhan  ug  ang  mga  gimithi  pa  niya  alang s a dugang  mga  negosyo  sa Mandaue,  maoy  iyang  giawhag  sa  katawhan  nga  ubanan  siya, kay  kining  tanan  dili lamang  sa kaayohan  sa  mga  ginikanan  kundili  labi  kining  matagamtaman  sa ilang  mga  anak  ugma  damlag. (BANAT NEWS)