CEBU, Philippines - Gibana-banang 300 ka mga pet owners ang mipahimus sa gipahigayong libreng Veterinary Medical Mission kagahapon didto sa City Auditorium sa syudad sa Lapu-Lapu.
Kining maong kalihokan gipangunahan sa Lapu-Lapu City Veterinary, Provincial Veterinary Office, Department of Agriculture Regional Field Unit 7(DA-7), South Western University Medical Association, Central Visayas Chapter, ug usab Department of Veterinary Medicine and Fisheries (DVMF). Matud pa ni Dr. Janice Tugunon, veterinary officer sa Lapulapu City nga nahinabi sa Banat News kagahapon nga kining maong kalihokan matag tuig kini nila nga gipahigayon isip tabang ngadto sa mga nanag-iya og mga iro, iring ug uban pa.Silang mga taga veterinary office maoy mo-supply og medikal nga serbisyo sa maong mga binuhing hayop.
Dugang pa ni Tugunon nga gusto usab nila nga ipakita ngadto sa ubang tawo ang ilang paningkamot nga mahimong rabies free ang syudad sa Lapu-lapu sa tuig 2015. Gipadayag ni Tugunon nga kining maong kalihokan makatabang usab sa pagminus sa kaso sa rabies ngadto sa mga tawo nga posibleng mapaakan og iro .
Gisaysay usab ni Tugunon nga dako kaayo ang mahatag nga benepisyo kun ang maong syudad mahimo na nga rabies free tungod kay ang Sugbo usa man usab sa mga tourist attraction sa Pilipinas. Busa gikinahanglan gayud nga ipaniguro usab sa mga Filipino ngadto sa mga langyaw nga turista nga luwas sila batok sa rabies. Gitug-an usab ni Tugunon nga ang mga nagkadaiyang libreng medikal nga serbisyo nga gitanyag sa mga pundok sa mga beterinaryo kagahapon naglangkob sa libreng castration, deworming, anti rabies vaccination, vitamins suplementation ug usab libre nga konsultasyon.
Giawhag usab ni Tugunon ang mga mapaakan sa iro nga unta modangop gilayon sila ngadto sa haduol nga Veterinary Office aron matambalan sila ug kadtong nanimuyo sa halayo nga veterinary office mahimong mohimo og temporaryong first aid sama sa paghugas gilayon sa ilang samad gamit ang bisan unsang sabon para makuha ang mga virus. Ila usab dayon kining butangan og betadine apan kung mahimo mas maayo nga modangop dayon sila sa veterinary office aron mahatagan og alibyo. Gibutyag ni Tugunon nga sa pagkakaron ilang nasuta nga wala pa gayud mahigmata ang ubang pet owner kung unsay ilang angay nga buhaton sa ilang mga binuhing hayop. Iyang gipanghinaot nga unta magpakaresponsabli ang matag usa sa paghatag og maayong pag-atiman sa ilang mga binuhing hayop. Mas gikinahanglang makapahimus sila sa mga gitanyag nga libreng medical nga serbisyo alang sa hayopan ug usab pagpakaon og tarong niini. (BANAT NEWS)