CEBU, Philippines - Gusto g’yud si Cebu City Agriculturist Joelito Baclayon nga ang opisina sa City Agriculture Department (CAD) adto ibutang sa Barangay Taptap aron nga duol ra sa mga mag-uuma ang pagduol kun manginahanglan sa ilang pangalagad.
Si Baclayon mitug-an nga usa kini sa rason nga moduso siya og P51 milyones nga budget para sa CAD alang sa tuig 2014 kay aron magahinan og salapi ang pagtukod sa CAD office.
Apan samtang si Baclayon miingon nga sayon ra nga duolon ang iyang opisina kun adto kini magbasi sa bukid, lahi ang baruganan sa pipila ka opisyal sa kabarangayan.
Adunay pipila ka barangay kapitan sa bukid nga mihulagway nga lisud na hinoon alang sa mga mag-uuma ang pag-adto sa Barangay Taptap kun tua sila magpuyo sa layo nga barangay sama sa Buot-Taup ug uban pa nga barangay.
Pagka- karon ang opisina ni Baclayon anaa mahimutang sa inabangan nga building duol ra sa City Hall. Dili g’yud hinoon makapaniguro si Baclayon nga ang pangayoon niya nga P51 milyones nga budget aprobahan sa Local Finance Committee ingon man sa City Council.
Karong tuiga ang City Agriculture Department gihatagan lang og P9 milyones nga budget. (BANAT NEWS)