CEBU, Philippines - Patay ang head guard sa Kepco Power Plant sa dakbayan sa Naga human sa karambola sa tulo ka mga sakyanan sa highway sa Poblacion Ward-3 lungsod sa Minglanilla niadtong Sabado sa alas 3:50 sa kaadlawon. Patay nang nadangat sa tambalanan si Lauro Atillo, taga Tisa ning dakbayan sa Sugbo ug head guard sa Kepco Power Plant nga nahimutang sa siyudad sa Naga.
Samtang ang nakadasmag niya mao ang multicab nga gimaneho ni Santos Torres, 50, usa ka mekaniko ug nagpuyo sa barangay Vito sa lungsod sa Minglanilla.
Samtang ang ikatulo nga sakyanan nga maoy nakaingon sa disgrasya mao ang cargo truck nga wala makuha ang plate number ug pangan sa drayber tungod kay miikyas kini human sa hitabo.
Matud ni PO2 Vincent Alinabo sa Minglanilla Police dihang nahinabi sa Banat News ang multicab gikan sa siyudad sa Sugbo ug misuway og overtake sa taxi nga iyang gisundan.
Apan naatol nga maoy pagsugat sa cargo truck nga paingon sa siyudad sa Sugbo hinungdan nga miaksyon kini og lihay apan nasaghiran gyud kini sa luyong bahin sa cargo truck maong nawad-an sa kontrol si Torres. Mitipas sa tuong bahin ang multicab ug didto gidaro ang gisundan niining motorsiklo ug maayong pagkapiit sa kongkretong poste sa kuryente si Atillo.
Ang cargo truck wala gyud manumbaling ug milahos og sutoy paingon sa dakbayan sa Sugbo.
Ang mga estambay sa lugar apil na ang drayber sa multicab daling mitabang ug gihatud nila ang biktima sa Minglanilla District Hospital apan gi deklarar kini sa mga doctor nga dead on arrival.
Samtang ang multicab drayber gitanggong na karun sa karsel alang sa pagpasaka og tukmang ug gipangita pa usab ang nisibat nga cargo truck. (BANAT NEWS)