Pito ka tawo nadakpan sa drug bust sa Talamban

CEBU, Philippines - Pito ka tawo ang nasikop sa mga sakop sa City Intelligence Branch atol sa gipahigayong buybust operation sa miaging gabii diha sa Sitio Kadaho-an barangay Talamban dakbayan sa sugbo.

 Ang mga nasikop mao silang Cipriano Barba, 44; Welvin Paray, 40, Ian Paray, 28, Roland Amaro, 37, Juncee Cabillon,  20, Raymond Durano; Brendo Nacua, 43, ug usa ka nagpaila lang nga Brendo. Ang mga sakop sa CIB nakadawat ug taho kalabot sa pagpamaligya og ginadiling drugas ni Barba sa dapit hinungdan nga dali silang mipahigayon og buybust operation sa maong dapit. Si Insp. Gomersendo Mandawe ang deputy chief for Operations sa CIB, miingong usa ka drug den ang balay ni Barba ug didto usab nasikop ang laing unom ka tawo nga gidudahang nanuyop.

Ang mga dinakpan usab mihimakak sa mga pasangil batok kanila.  Samtang si Barba sa iyang bahin, mihimakak usab nga iya ang usa ka bultong drugas apan miangkong didto sa ilang balay kini giingong nakuha.

Gibuhian hinuon ang mga Paray, si Cabillon, Nacua ug Brendo. (BANAT NEWS)