Mga karsada sa Mandaue palapdan

CEBU, Philippines - Gikampanya  karon  sa kagamhanan  sa  dakbayan  sa Mandaue  nga  palapdan  ug   palawoman ang  mga kanal sa kadalanan nga nagtadlas sa nagkadaiyang kabarangayan sa maong  dakbayan.

Kini  maoy solusyon  sa  nag-unang suliran sa trapiko,  matud  pa  ni  Mayor  Jonas  Cortes.

Gawas  sa trapiko,  sulbaron  usab  pinaagi  niini  ang  kanunay  nga   pagbaha sa  panahon nga kusog ang pagbunok sa ulan.

Si Mayor  Cortes  miingon nga gawas  niini gipaaspalto  niya  karon  ang  7,010  metros nga gilay-on sa karsada  sa  maong  dakbayan.

Gitataw niya nga ang problema  sa  baha sa kadalanan  sa  panahon  nga  mobundak  ang  ulan  dili usab kalikayan  sanglit ang dakbayan sa Mandaue  nahimutang sa ubos nga bahin  sa dakbayan sa Sugbo.

Dugang pa niya nga  ang 27 ka barangay sa dakbayan mao usab ang nagsilbing tigsawod  sa tubig gikan sa kabukiran  sa Consolacion, dakbayan sa Sugbo ug uban pa.

Matud pa ni Cortes   nga  nakita niya  ang kamahinungdanon   sa koordinasyon sa mga opisyal sa maong mga lugar.

Midugang  ang  mayor nga  gusto  niyang  maghiusa  ang mga opisyal sa   kabarangayan    sa paghatag og sulbad sa maong suliran. (BANAT NEWS)