Carbon Market ipakural sa siyudad sa Sugbu

CEBU, Philippines - Kuralon na sa kagamhanan sa dakbayan sa Sugbu ang Carbon Public Market Unit-1 aron pagsanta sa pagpangawat nga dali ra kaayo makasibat ang kawatan human makahimo og krimen.  Ang laing tumong nga kuralon mao ang “meat section” mao ang pagsiguro nga ang tanang mga karne nga ibaligya sa maong merkado haum nga kan-on sa tawo ug dili makadaut sa panglawas.

Dul-an sa lima ka milyon ka pesos ang kantidad nga gitagana alang sa mao nga proyekto diin gisubasta na gani ug may kontraktor na nga nakadaug sa bidding.

Matud ni Konsehal Roberto “Bob” Cabarrubias nga atol sa bidding nga gipahigayon ang Ped Xing Construction maoy nakatanyag og labing ubos nga bid price sa kantidad nga kapin sa P4.9 milyones.

Ang pundo nga gamitan niining maong proyekto adto kuhaon sa Supplemental Budget No. 2 sa miaging tuig.

Sa sesyon kaniadtong Miyerkules, si Cabarrubias misuway pagduso og resolusyon nga maghatag og pagtugot ni Mayor Michael Rama nga makapirma og kontrata uban sa tagdumala sa construction company.

Apan si Cabarrubias wala modayon sa pagduso sa iyang resolusyon. Basi sa giandam nga kontrata, ang maong proyekto nga pagkural sa Carbon Market Unit 1 humanon lang sulod sa tulo ka buwan human kini kasugdi.

Plano ni Market Administrator Raquel Arce nga kuralon g’yud ang tanang mga merkado aron nga inig kagabii dili na kini pasudlan.

 Apan ang laing katuyoan niini mao nga malikayan ang pagsulod sa mga kawatan. (BANAT NEWS)