P297mil para feeding program sa San Isidro, Bohol

CEBU, Philippines - Mikabat sa  P297,600 nga pundo ang giturn- over ni  Regional Director  Mercedita  Jabagat sa  Department of Social Welfare and Development (DSWD-7) didto sa San Isidro,  Bohol  sa miaging  semana.

Matud pa ni Kerwin Macopia  sa DSWD nga ang maong pundo gamiton alang sa ika -tulo nga cycle   ug implementasyon sa Supplementary Feeding Program (SFP). Dugang pa ni Macopia nga mokabat sa 248 ka mga kabataan nga na enroll sa tanang 12 ka Day Care Centers sa maong lungsod ang gipaabot nga makabenepisyo sa maong programa ning tuiga.

Gipasabot ni Macopia nga ang SFP usa ka probisyon alang sa suplementasyon sa pagkaon pinaagi sa hot meals nga ihatag atol sa snack/meal time sa mga kabataan.

Himoon  kini matag lima ka adlaw sa  kada semana sulod sa dili molapas sa 120 ka adlaw.

Sumala pa ni Macopia nga ubos niining maong feeding nga programa ang mga benepisyaryong mga kabataan mao kadtong nagpanuigon og 3 hangtod 5.

Dumalahon kini sa ilang mga ginikanan base sa gipreparar nga meal cycle gamit ang available nga indigenous nga pagkaon.

Gitug-an ni Macopia nga sa pagkakaron, sa 132 ka mga lungsod ,  sa rehiyon  7, ang San Isidro pa lamang  ang unang Local Government Unit (LGU) nga moimplementar sa SFP sa unang cycle sa tibook rehiyon.

Tumong sa SFP nga mapausbaw ang kaalam, kinaiya, ug mga binuhatan sa mga kabataan nga na-enroll sa gobernong pre-schools pinaagi sa gipatas-an nga nutrisyon ug health education gawas sa probisyon ug suporta sa ilang regular meals.

Sa susamang kalihokan si Senador Manny Villar mipagawas usab og P250,000 nga pundo gikan sa Priority Development Assistance Fund (PDAF) niini ngadto sa maong lungsod.

Ang DSWD-7 misalmot  usab sa selebrasyon sa Nutrisyon ning buwana nga adunay tema nga “Gutom at Malnutrisyon, sama-sama nating Wakasan!”. Kini  sa tinguha  nga  mapatas-an ang  nakat-onan bahin  sa isyu sa kagutom ug usab aron madasig ang mga magpapatigayon sa pagbubo og suporta  niini sa pagsulbad sa isyu nga may labot sa kagutom. (/WC) (BANAT NEWS)