Bakuna batok pneumonia himoon sa health center

CEBU, Philippines - Ang Department of Health (DOH)  mipahibalo nga ang bakuna batok pneumonia sa kabataan pagahimoon sa tanan nga health centers sa tibook nasud.

Gisaysay ni Regional Director Asuncion Anden nga ang Pneumococcal Conjugate Vaccine (PCV) gilakip na sa programa nga may labot sa pagpamakuna sa mga bata ug usab puya diin ubos usab kini sa programang Expanded Program on Immunization (EPI) sa DOH.

Base sa talaan sa Philippine Health Statistics of 2010 ang sakit nga pneumonia ikaduha sa nag- unang hinungdan sa infant mortality sa tuig 2010 nga adunay 2,628 na nga nangamatay.

Kung mahospital ang tawo nga adunay kaso nga pneumonia mahimong mogasto kini og P23,500 nga maglakip sa  professional fee, consultation, laboratory tests ug mga tambal sumala pa sa hepe  sa panglawas.

Ang kompleto nga bakuna sa pneumonia matag bata mokabat sa kantidad nga P2,050.

Ang rehiyon sa ARRM ug Caraga ang una nga makabenepisyo sa PCV,  ug isunod ang uban nga rehiyon matag tuig hangtud nga makompleto ang tanang rehiyon sa tibook nasud.  Ang ARRM ug Caraga ang anaa sa ika-13 sa listahan nga adunay labing taas og kaso sa pneumonia.

Hatagan og bakuna ang 333,000 ka mga bata nga  anaa  sa edad unom hangtud onse ka bulan nga nasakop sa mga probinsya ug syudad sa Caraga ug ARRM diin morepresentar kini sa katorse porsyento sa 2.4 milyon nga target infants sa tibook nasud.(/WC) (BANAT NEWS)