2 level 2 pushers sa Cordova nadakpan
CEBU, Philippines - Duha ka mga lalaki ug kwarentay uno ka mga paketeng shabu ang nakuha sa kapulisan sa Cordova sa gipahigayon nga buy-bust operation kagabii sa Sitio Calan, Barangay Poblacion lungsod sa Cordova.
Ang mga dinakpan giilang sila si Bilmar Degamo, 27, ug si Juanito Mapa, 25, taga Barangay Buagsong, misuway unta sa pag-ikyas apan nasikop ra sa kapulisan.
Ang illegal nga buhat sa mga suspeks gimonitor sa kapulisan sulod sa duha ka semana sa dihang nabantayan ni Chief Insp. Alvin Balio, hepe sa Cordova Police Station, nga pirming daghan og tawo ang balay ni Degamo.
“Murag magpista kada hapon sa lugar…drug den pud diay ang balay nga naay mag-waiting sa gawas tungod sa kapuno,†matud ni Balio kinsa midugang nga drug den diay ang maong balay.
Matud ni Balio nga si Degamo ang personal nga mitunol sa shabu ngadto sa poseur buyer nga hinungdan sa pagkasikop niini. Nakuhaan usab siya og 36 ka gagmay nga pakete nga mubalor sa P11,000, duha ka P200 ug P1,650 cash.
“Nikisi-kisi gyud na siya pero daghan man mi,†matud ni Balio.
Si Mapa nga diha sa maong operasyon misuway sa pagdagan dayong labay sa lima ka pakete sa shabu apan nasikop ra usab ug narekober ang shabu. Si Degamo wala sa watchlist sa Cordova Police Station apan si Balio mibutyag nga bag-o nga misulod sa maong kalihukan si Degamo nga karon level two drug pusher na.
Kasong kalapasan sa Sections 5 ug 11 sa RA 9164 o Dangerous Drugs Act of 2002 ang ipasaka batok sa suspek nga nagtingkagol sa karsel sa Cordova Police Station.( /EIM) (BANAT NEWS)
- Latest
