Martinez way nadawat nga kopya sa gibasurang mosyon

CEBU, Philippines - Wala pa makadawat og kopya sa gibasurang mosyon ang mga Martinez sa dakbayan sa Sugbo may kalabutan sa kasong ilang giatubang sa Sandiganbayan.

Kini ang giklaro ni kanhi Bogo City mayor Celestino “Tining” Martinez kinsa usa sa mga sinumbong kauban sa iyang inahan nga si kanhi Kong. Clavel Asas-Martinez.

Matud pa ni Tining nga diha lang sila sa pamantalaan nasayud nga gibasura ang ilang mosyon sa Sandiganbayan. Sa higayun nga madawat na nila ang kopya sa kamandoan nga nagbasura sa mosyon, mahimo pa silang moduso og laing mosyon.

Gikataho nga ang Second Division sa Sandiganbayan miluwat na og warrant of arrest batok sa mga sinumbong ug gipadala na kini sa Police Regional Office 7 pinaagi sa koreyo. Ang pagluwat sa warrant of arrest resulta sa gibasura nga mosyon sa mga Martinez sa dili una pagluwat niini samtang aduna pa silay motion for reconsideration sa buhatan sa Ombudsman Visayas.

Gawas ni Tining, laing nag-atubang sa kaso ang anak ni Clavel nga si kanhi Girl Scouts of the Philippines treasurer Ma. Cielo Martinez, kanhi municipal treasurer Rhett Minguez, kanhi municipal accountant Cresencio Verdida, bookkeeper Rhodariza Kilantang ug GSP Cebu Council cashier Julieta Quino. Sila si Minguez ug Verdida parehong napiling konsehal sa dakbayan sa Bogo sa niaging eleksiyon sa Mayo 13.   

Lakip sila sa gipasanginlan nga nangawkaw ug niwaldas sa P10 milyones nga pundo nga alang unta sa GSP apan giingong gisulod sa personal nga account sa bangko ni Clavel. Piyansa nga P40,000 ang girekomendar sa kasong anti-graft samtang walay piyansa ang kaso sa malversation. (BANAT NEWS)