Paltik Task Force tukoron, pagpamuhat og legal nga armas sa Danao planong banhawon

CEBU, Philippines - Suportado sa Hunta Probinsiyal sa Sugbo ang lakang sa kagamhanan sa dakbayan sa Danao sa paghangyo sa Department of Interior and Local Development (DILG) nga mohulma og task force nga motoon sa posibling paglegalisar pagpamuhat og paltik nga armas sa maong lugar.

Gipasar sa hunta probinsiyal ang resolusyon nga giduso ni Bokal Arleigh Jay Sitoy nga nagsuporta sa maong hangyo sa konseho sa dakbayan sa Danao.

Matud pa ni Sitoy nakatabang sa panginabuhi sa mga tawo ang maong negosyo apan wala kaayo matagamtam ang  ubang benepisyo.

Ang konseho sa syudad nga gipangulohan ni Bise Mayor Ramon “Red” Durano VI nipasar sa resolusyon isip pasiunang lakang.

Matud pa ni Durano nga si DILG Sec. Mar Roxas II nagpaabot sa maong resolusyon aron iyang matigum ang task force.

Ang igsoon ni Durano nga si Kong. Joseph Felix “Ace” Durano ang makig-alayon usab sa DILG aron mapadali ang proseso.

Niadto pang 1990’s nisaka ang pagpamuhat og armas sa dakbayan sa Danao hinungdan nga nikatap usab ang mga dili lisensiyadong mga armas dili lang sa Sugbo lakip na usab sa laing bahin sa nasud.

Si kanhi kongresista, Mayor Ramon “Nito Durano III, nidasig sa mga mamuhatay og armas nga maghiusa ug natukod ang usa ka kooperatiba apan nabungkag sa kakuwang sa suporta.

Dili pa lang dugay, ang Philippine National Police namalit og balor P9 bilyones nga Glock Pistols gikan sa gawas sa nasud aron iisyu sa kapolisan. (BANAT NEWS)