Taxi unit sa Cebu igo ra ang gidaghanon

CEBU, Philippines - Giklaro sa Land Transportation Franchising and Regulatory Board ( LTFRB) nga husto ra ang  gidaghanon  sa   mga taxi unit nga nagdagan dinhi sa Sugbo ug wala silay  plano nga moluwat og dugang prangkisa alang niini.

Matud ni LTFRB-7 Regional Director Ahmed Cuizon atol sa interview sa Bantay Radyo nga dili tinuod ang report   nga adunay  dugang 200  ka bag-ong prangkisa ang  idugang  sa  mga  taxi dinhi  sa Sugbo.

Gipasabot ni director Cuizon nga kun dunay panginahanglan sa pagdugang og mga taxi units dinhi sa Sugbo,  o  kaha  sa  tibuok rehiyon,  ang ilang buhatan maoy mopadangat og request niini   ngadto  sa ilang ulohang buhatan.

Sa pagkakaron,  matud ni director Cuizon  husto ra  ang gidaghanon sa mga taxi unit dinhi sa Sugbo nga gibana- banang mokabat  og mga 5 mil  ang  tanan

Gitataw ni Cuizon nga padayon pa usab karon nga  mi-epekto ang moratorium   sa pagdugang  og  mga  taxi unit sa Sugbo nga una nang gipatuman kaniadto.

Kini  sa tinguha  nga   makontrolar ang grabing pagdaghan sa mga taxi unit sa Sugbo.

Gipasabot ni Cuizon nga makatampo sa suliran sa trapiko kun patuyangan ang pagpadaghan sa mga taxi.

Nunot niini padayung gihingusgan   pagpanakop sa LTFRB ang mga colorum nga sakyanan nga mokawat -kawat sa pagpamasahero dinhi sa Metro Cebu Area.

Giawhag    usab sa LTFRB ang kooperasyon sa publiko pinaagi sa  pagsumbong   ngadto  sa ilang buhatan aron kini madakpan. (BANAT NEWS)