300 ka punoang marijuana gilarot

CEBU, Philippines - Kapin sa 300  ka  punoang  marijuana ang nalarot sa mga sakop sa Public Safety Company (PSC),  kauban  ang   mga barangay tanod ug   mga  opisyal  sa barangay  didto  sa  sitio Lubo, barangay Bonbon bukirang bahin sa dakbayan sa Sugbo  sa miaging adlaw.

Si Chief Inspector Melbert Esguerra,  hepe sa Cebu City  PSC   nagkanayon  nga aduna silay  nadawat nga impormasyon kalabot sa mga tinanom nga marijuana sa bukirang bahin sa dakbayan sa Sugbo. Usa na niini mao ang sa sitio Lubo hinungdan nga milihok dayon  sila ug  ilang gilarot ang mga gidiling  tanom.

Gibana-bana sa kapolisan nga mokabat sa P120 mil  ang aboton sa maong marijuana kun kini mauga ug ipatimbang  na  sa kinilo. Gipadayag usab ni Esguerra nga dili lang kay sa barangay Bonbon sila naka-monitor nga adunay mga tanom  nga   marijuana,

Hinuon  iyang   gipasalig  nga ila kining aksyonan sa labing daling panahon.

Sa  ilang  paglarot   sa maong  mga  tanom wala silay nasakpang tawo  nga posibling maoy nag-atiman o nagtanom  niini.

Sa pagkakaron  anaa sa ilang  buhatan  ang maong  mga  punoan  sa  marijuana  ug  ila  pa  kining ipadangat  ngadto  sa buhatan  sa kapolisan  sa  lalawigan  kinsa  maoy mohatag  og schedule  aron sa pagdaob  niini. (BANAT NEWS)