Dakong sawa mitukob sa iring gikagubtan sa Jagobiao

CEBU, Philippines - Naukay ang  mga residente sa barangay Jagobiao dakbayan sa Mandaue sa dihang usa ka dakong sawa nga adunay gitas-on nga tulo ka metros ang ilang nakit-ang mitukob sa usa ka iring diha sa ibabaw sa punoan sa Kaimito.

Milanat og kapin usa ka oras  nga giplanuhan sa mga sakop sa Special Weapons and Tactics sa Mandaue  City Police (MCPO) ug sa mga barangay tanod sa Jagobiao kun unsaon nila pagdakop ang nahisgutang sawa nga adunay gibug-aton nga 15 kilos ug gidak-ong sama sa paa sa usa ka tawo.

Matud pa ni Virgie Descallar ang tag-iya sa punoan Kaimito diin magbalikos ang sawa nianang pagkaalas onse sa gabii, natingala sila sa pagsige og paghot sa ilang iro hinungdan nga gisusi kini sa iyang bana nga si Ruben  apan way tawo kining nakita maong mibalik kini og sulod.

Subli na usab nga mipaghot ang mga iro hinungdan nga migawas pagbalik si Ruben ug nagdala na og flashlight ug giiwagan ang palibot ug didto iyang nakita ang sawa nga nagtangag sa usa ka hamtong na nga iring.

Gumikan niini nangayo sila og tabang sa kapolisan sa dakbayan ug sa barangay tanod sa Jagobiao.

Tulo ka mga sakop sa SWAT ang nangatkat sa sanga diin magbalikos ang bitin apan nabali kini. Ang mga tawo naalibwag sa kahadlok apan daling nakuptan sa mga tanod ug polis ang baba sa sawa ug gibutangan kini og tape aron di makapaak.

Ang nahisgutang sawa ang gi-turnover na sa kapolisan sa buhatan sa Department of Environment and Natural Resources kagahapon sa hapon.  (BANAT NEWS)