Nanablig og asido gipatay

CEBU, Philippines - Lalaking maoy gipasanginlang misablig og asido sa duha ka mga iro sa dakbayan sa Talisay gitabangan sa pagdunggab patay sa managsuong silingan atubangan mismo sa iyang asawa tungod sa pamasangil niini sa usa sa mga suspek nga ‘kawatan’ og mangga.

Ang gipatay mao si Alfred Alindao, 44, molupyo sa sitio Upper Bontores, barangay Mohon dakbayan sa Talisay.

Samtang padayon pang gipangita ang managsuong suspek nga sila si Eduardo Pardillo ug ang 17-anyos nga manghod niini.

Sa pasiunang imbestigasyon, nasakpan sa biktima ang menor de edad nga suspetsado nga nanguha og mangga sa ilang tugkaran maong gikomprontase niini ang maguwang nga suspetsado.

Ang maguwang nga suspek wala makauyon sa pasangil sa biktima ngadto sa manghod ug nianang pagka-hapon, nagdala si Eduardo og usa ka pusil ug giatangan niini ang biktima aron unta pusilon.

Apan mikagar ang armas dihang iyaha na untang gipunting ang biktima hinungdan nga gipusposan na lang kini ni Eduardo sa maong pusil hinungdan nga nawad-an og panimuot.

Matud pa nga pagkahuman niini miduol ang manghod nga gipasanginlang ‘kawatan’ og mangga ug midunggab sa biktima diha sa dughan nga maoy nakaingon sa hinanali niining kamatayon.

Ang asawa sa biktima nga si Tessie kauban niini nianang tungora ug misuway pa sa pagpakgang sa mga suspek ug gihap-an ang lawas sa bana aron di kini hilabtan apan gibunlot kini sa mga suspek ug dihadiha gidunggab si Alindao.

Matod pa ni SPO1 Edgar Causon sa Talisay City Police Station nga ilang gigukod ang mga suspek apan wala na sila sa lugar.

Ang biktima nahimong kontrobersyal human kini gipasanginlan ug miangkon usab sa usa ka ‘televised” public apology nga siya maoy misablig og asido sa duha ka mga iro sa ilang lugar. Tungod sa iyang gibuhat giplanohan siyang ikiha sa mga sakop sa Cebu South Dog Club og kalapasan sa Animal Welfare Act.   (BANAT NEWS)