Menor de edad nga manglungkabay sa paknaan, Mandaue nadakpan

CEBU, Philippines - Usa ka kinse anyos nga menor de edad nga gipasanginlang maoy responsable sa sunod-sunod nga pagpanglungkab diha sa dakbayan sa Mandaue ang nasikop sa nagpatrolyang kapolisan diha sa may Sitio Kagape sa Brgy. Paknaan, dakbayan sa Mandaue niadtong Biyernes sa gabii.

Ang nahisgutang minor de edad nga taga Zone Sibuyas sa Brgy. Paknaan ang nasikop nila ni Basak Police station chief, Sr. Insp. Wilson Abot  samtang sila nagpatrolya sa nahisgutang dapit gumikan usab sa sunod-sunod nga panghitabo sa lungkab .

Siya nasikop gumikan ra usab sa iyang kadudahang linihokan hinungdan nga gisita sa mga polis  apan imbes mohunong sa paglakaw mikalit kini og dagan  maong nahitabo ang ginukdanay hangtud nga siya naapsan.

Matud pa nga sa dihang girekisa kini usa ka .45 kalibre nga pistola nga adunay usa ka magazine nga adunay sud nga pito ka mga buhing bala ang nakuha gikan kaniya.

Atol sa usa ka police interrogation ang suspetsado miangkon nga siya nalambigit sa mga pagpanglungkab diha sa ilang barangay  ug gani duha na usab siya ka higayon nga natanggong sa prisohan gumikan sa maong salaod.

Gitug-an usab niini sa polis kun diin niya gipamaligya ang mga butang kinawat nga miresulta sa pagka-recover sa pipila ka mga butang gikan sa usa ka balay sa relocation site sa Paknaan .

Ang mga kinawat nga butang nga nakuha pagbalik sa kapolisan naglakip sa usa ka Cherry Turbo pad, usa ka Acer laptop, usa ka Dell laptop, usa ka A4 Tech Headset, usa ka Astra mouse ug usa ka Viewsonic nga computer monitor.  Ang suspetsado nagtingkagol na karon sa Basak Police Station samtang gihikay na ang mga kasong ipasaka sa minor de edad karong adlaw’ng Lunes. (BANAT NEWS)