Tindak Board giumol alang sa pagtukod og bike lanes

CEBU, Philippines - Usa ka board ang giumol nga langkoban sa representante sa gobyerno ug pribadong sektor alang sa planong implementasyon sa bike lanes sa Cebu City. Pagatawgon kini nga “Tindak Board”, ang ideya nasabutan sa tanang mitambong sa meeting sa buhatan ni Konsehal Nida Cabrera uban si CITOM executive director Atty. Rafael Yap ingon man ang representante gikan sa mga bike enthusiasts group Movement for a Livable Cebu (MLC), Critical Mass Cebu, Bike to Work Cebu.

Nagrepresentar sa MLC ang ilang lead convenor nga si Marc Canton inubanan sa laing convenor nga si Rudy Alix samtang si Ryan “Rye Kido” Noval maoy mitambong alang sa bike riders. Mitambong usab ang kanhi planning officer sa dakbayan nga si Niceforo Iroy kinsa apil sa unang nagplano sa proyektong bike lanes para sa syudad.

Dihang nasabutan nga kinahanglang dunay modala sa opisina gawas sa city hall nga opisyales, miboluntaryo ang road sharing activist nga si Noval tungod kay matud niya makatabang siya sa pagpadangat sa mga sentimiyento sa mga magbisikleta.

Ang mga opisyales sa city hall maoy mogiya sa legal ug ensaktong paagi agi’g pagsubay sa Local Government Code ug ubang balaud.

Gituki usab sa maong meeting ang detalye sa draft ordinance ni Cabrera alang sa pag-establisar og bike lanes nga pagatawgong “The Tindak Lanes Ordinance.”

Ang maong ordinansa nagtumong sa paghan-ay sa tulubagon sa gobyerno, motorista, pedestrians, ug bike riders alang sa malampusong implementasyon sa bike lanes project.

Dunay gilatid nga mga regulasyon alang sa mga molapas nga establisamento ug riders kun ma-implimentar na kini. Ang malapason nga establisamento nga way bike lanes pamultahon sa unang kalapasan og P1,000, P3,000 sa ikaduhang higayon, P5,000 sa ikatulo, ug pagtangtang sa permit alang sa mosunod nga higayon. Samtang ang mga bikers, unang paglapas mopabayad kanila og P500, P1,000 sa ikaduhang higayon, P1,500 sa ikatulo. Giduso sa gobiyerno ug pribadong sector ang bike lanes isip alternatibo ug eco-friendly mode of transportation.

Gikatakda usab nga modonar ang MLC og bike racks sa nagkadaiyang mga establisamento. Matud ni Canton, di moubos sa usa ka dosenang bike racks ang ilang ibutang sa nagkadaiyang pwesto sa dakbayan. Ang CITOM mihatag na sa ilaha og inisyal nga lista sa mga lugar apan kini dili pa pinal tungod kay kinahanglan pa kining kumpirmahon pinaagi sa ocular inspection. (BANAT NEWS)