Joavan mi-plead not guilty
CEBU, Philippines - Mi-plead not guilty ang kontrobersyal nga anak ni Talisay City Councilor Socrates Fernandez nga si Joavan sa duha ka mga kasong giatubang diha sa sala ni Judge Leopoldo Cañete sa Regional Trial Court Branch 60 sa Barili.
PO2 Edwin Eliot sa usa ka phone interview nagkanayon nga si Joavan inabagan sa iyang abogado nga si George Bragat mihimakak sa pasangil sa duha ka kaso illegal nga pagkupot og armas ug kalapasan sa Commission on Elections (Comelec) gun ban.
Niadtong Mayo 20, 2013, si Joavan naaresto sa kapulisan, duha ka semana ang nakalabay human kini miikyas sa Talisay City detention center. Siya nadakpan sa usa ka resort sa Barangay Saavedra, Moalboal.
Matud pa nga atol sa pagkasikop kaniya, nakuhaan siya og usa ka calibre 45 nga pistola samtang siya ug ang iyang duha ka mga kauban nangandam na unta sa paglarga padung sa Negros gamit ang usa ka motorized banca.
Kahinumduman nga niadtong Mayo 6, 2012 si Joavan naaresto sa Talisay City Police sa Barangay Bulacao pinasikad sa bench warrant nga gi-issue ni MTCC Judge Mario Manayon tungod sa kapakyas niya pagtambong sa hearing sa kasong giatubang nga physical injury.
Atol sa pagdakop, giingong nakuhaan siya sa mga polis sa Talisay og usa ka .9mm pistol ug granada.
Pero niadtong Mayo 8 nakaikyas kini samtang gihikay pa ang kasong ipasaka nga illegal possession of firearms, violation of Comelec gun ban ug illegal possession of explosives ngadto sa korte. (Mylen Manto/EIM) (BANAT NEWS)
- Latest
