Nag-cutting classes nalumos sa lim-aw

CEBU, Philippines - Patay ang tinun-an sa Grade  II sa Leonard Wood Elementary  School sa barangay Jagobiao sa dakbayan sa Mandaue nga nalumos samtang naligo sa lim-aw alas 12  pasado ang takna  sa udto sa miaging adlaw.

Si SPO2 Danilo Barrita sa kapolisan sa Presinto 3 sa Mandaue City Police Office (MCPO) miila sa biktima nga mao si James Luis Sarsalejo, 9 -anyos nga nagpuyo usab sa maong dapit. Matud pa ni Barrita nga kuyog sa bata ang mga classmates niini sa pagpanggawas sa ilang tulunghaan ug sa pagpamauli mihapit kini sa naglim-aw nga tubig nga nahimutang sa usa ka pribadong luna.

Sumala pa nga nag-cutting classes ang mga bata ug nanglakaw padung sa maong lim-aw ug nangaligo. Nasuta nga way gwardiya nga nagbantay sa tunghaan maong walay makabadlong kung dunay moikyas gikan sa klase.

Ang caretaker sa maong luna nga si Jerry Cabiquing mibadlong pa unta sa mga bata apan wala mopatuo.

Si Cabiquing mibutyag sa kapolisan nga nabantayan niini nga nagpusnga na si Sarsalejo nga motunga ug motidlom sa tubig ug nagpunay sa pagkapakapa ug dihang iyang naduolan milutaw na kini sa tubig ug wala nay panimuot.

Dali kining gidagan ni Cabiquing ug dali nga gihaw-as sa tubig ug gidala sa daplin ug dali usab niining gihatod ngadto sa tambalanan sa Eversely Child Sanitarium  Hospital sa barangay Jagobiao sa maong dakbayan apan gideklarar kini sa mga doktor nga dead on arrival. (/EIM) (BANAT NEWS)