Presidente sa LCC miatubang sa konseho

CEBU, Philippines - Pormal nga miatubang sa konseho sa dakbayan sa Lapulapu si Atty. Tomas Ramos ang Presidente sa Lapulapu City College nga adunay sobra sa 500 mil ka pesos nga wala ma-remit nga collection ngadto sa City treasurers Office sa dakbayan sa Lapulapu. Si Atty. Ramos nga gipatawag sa hawanan sa konseho atol sa ilang unang regular session sa milabay’ng adlaw mipasabot nga walay anomaliya ang mga transaksiyon nga nasuta sa COA kalabot sa mga unremitted collection of fees sa Lapulapu City College o LCC sa tuig 2010 ug 2011.

Matud pa ni Ramos nga kalabot sa entrance fee sa mga tinun-an sa LCC didto niya gi-remit ang kwarta sa Cebu Technological University (CTU) nga maoy mikuha sa pasulit sa mga bag-ong tinun-an gumikan sa kakulangan sa kapabilidad niini kaniadto sa pagpahigayon sa entrance examination sa tuig 2010 ug 2011.

Samtang gipasabot usab ni Ramos nga kalabot sa insurance fees sa mga tinun-an kini usa ka pribadong transaksiyon ug walay labot niini ang lokal nga kagamhanan sa dakbayan sa Lapulapu diin ang matag tinun-an wala pugsa sa pagpakuha og insurance kundi optional lang kini sa mga ginikanan ug adto gidiretso sa insurance company nga nagtanyag niini.

Karong tuiga hapsay na ang transaksiyon sa LCC diin sila na mismo ang mikuha sa entrance examination sa mga tinun-an ug wala na kini mohangyo ngadto sa CTU. Gumikan niini miusbaw ang gidaghanon sa mga tinun-an karong tuiga og 200 porsiyento maong 1,400 na ka mga tinun-an ang nagtungha sa LCC karong unang semester.

Samtang si Lapulapu City Mayor Paz Radaza maghuwat lamang sa resulta sa pagpatawag sa City Council ngadto ni Atty. Ramos sa dili pa siya mohimo sa iyang hukom. Kahinumduman nga human masuta sa COA sa dakbayan sa Talisay nga si Atty. Ramos adunay mga unremitted collection sa Talisay City College hinungdan nga si kanhi mayor Soc Fernandez misuspenso ni Ramos.

Sa milabay’ng semana ang COA Lapulapu miingon nga adunay balor P503 mil nga collection si Atty. Ramos nga wala ma-remit sa siyudad ug ang mga gibayran sa mga tinun-an sama sa insurance fee ug entrance fee walay pagtugot gikan sa Board of Trustees sa maong tunghaan. (/EIM) (BANAT NEWS)