2 tiguwang gipatay sa ex-OFW

CEBU, Philippines - Usa ka Overseas Filipino Worker kon OFW nga gituohang nalisoan sa pangisip ang giingong mipatay sa iyang 64-anyos nga iyaan ug sa 76- anyos niya nga guardian nga usa ka dagang guwang diha sa Sityo Inamlang sa barangay Monteneza sa lungsod sa Malabuyoc niadtong Miyerkules sa alas 3:00 sa hapon.

Apan  ang suspek nga si Cristobal Alaban, 31,  giingong kalit usab nga namatay samtang nakigtabi sa mga paryente diha sa sulod sa karsel sa Malabuyoc Police Station ug wala na maluwas pa bisan gidala sa MJ Cuenco Memorial Hospital.

Ang mga biktima mao ang iyaan sa suspek nga si Salustiana Debelleres, 64, nagpuyo sa maong lugar ug ang guardian sa suspek nga si Leonila Paro, 76- anyos.

Si Alaban gikatahong miabot gikan sa Saudi Arabia niadto lang Hulyo 8 ning tuiga. Nagtrabaho kini sa usa ka furniture shop didto sa maong nasud.

Subay sa imbistigasyon nila ni SPO4 Faustino Filipinas sa Malabuyoc Police Station misaka sa bukid ang suspek aron makigkita sa higalang si Albert Catubig kay buot niining magpatambal og binisaya sa iyang gipamati sa lawas.

Apan matud pa nga samtang gipaabot pa ang pagpabukal sa dahon sa bayabas ug atis nga maoy ipainom kaniya sa magtiayong Catubig giingong kalit nga misuol ang sakit niini ug nag-huramentado ug gidiretso og tuok ang asawa ni Catubig nga si Marilyn.

Ang amahan ni Marilyn nga si Federico nakabantay sa gibuhat sa suspek ug mipunit og kahoy ug gipuspusan ang kamot niini hinungdan nga nakalingkawas ang ginang ug nakadagan sila palayo.

Apan matud pa nga misamot og kasuko ang suspek ug nag-huramentado diha sa dalan balik sa ilaha. Giingong pagkasayod ni Paro sa gibuhat ni Alaban dali kining miapas apan iyaha kining nasugatan sa dalan ug sa iyang pagduol giingong kalit kining gihapsan sa ulo gamit ang usa ka pala.

Bisan natumba na ang tiguwang giingong wala kini hunongi og bunal sa suspek hangtud nga namatay. Ang iyaan niini nga si Debelleres misuway usab unta sa pagbadlong kaniya apan kini na usab ang giatubang ni Alaban ug gipuspusan gihapon og pala sa ulo hangtud nga namatay.

Tungod niini, ang mga residente sa lugar nagtinabangay sa pagsikop sa suspek ug gidudahang gitabangan usab nila kini og kulata.

Matud pa nga pag-abot sa mga polis daw “gibinaboy” na kini paggaid sa mga tawo ug naputos og bun-og maong ilaha kining gidala sa presinto.

Apan matud pa nga samtang giestoryahan sa mga kabanay si Alaban diha sa sud sa karsel kalit lang kining milagom nga daw natuk-an ug naglisod na sa pagginhawa maong dali kining gidala sa  nahisgutang tambalanan.

Ang hepe sa Malabuyoc Police Station nga si Chief Insp. Roseller Paller sa report sa TV Patrol Central Visayas kagahapon sa hapon miingon nga dead on arrival na si Alaban pag-abot sa maong hospital.

Gikatakda pang ipailawom sa awtopsiya ang lawas niini kung unsay gikamatyan ni Alaban, apan duna nay mga pagduda ang mga residente didto nga posibleng ang pagkulata kaniya maoy naingnan sa kamatayon niini. (Darrel Carumba/EIM) (BANAT NEWS)