Ulitawo nga nanghasi gitipi

CEBU, Philippines - Gipusil patay ang usa ka ulitawo nga  nanghasi  ug sabaan   kaayo  kun mahubog, samtang kini naglakaw paingon na untang mopauli sa pinuy-anan niini didto sa Poblacion, lungsod sa Alcantara alas 10:40 sa nakalabay’ng gabii.

 Ang biktima mao si Freddie Yosores, 27, ulitawo, estambay ug nagpuyo sa maong lugar.

Samtang wala pay natumbok nga  kriminal  sa paghimo ning  maong  balita kay ngitngit ug mingaw na ang lugar nga nahitabo-an sa krimin. Si PO2 Teodolo Baya sa  Alcantara Police  Station mibutyag  sa Banat News nga  ang inahan   sa biktima  nga si Laureta Yosores, hingkod,  mibutyag   nga  sa  wala  pa  pusila  ang  biktima iya  kining nadunggan nga naglakaw duol na sa ilang  balay  nga  nagpunay  og  yawyaw  tungod  sa kahubog.

Midugang  kini  nga  wala  na  magdugay  ilang nabati  ang   duha ka   nagsunod -sunod nga buto sa armas

Dayon paglabay sa pipila ka minutos iyang gitawag ang biktima apan wala na kini motingog hinungdan nga iyang gisusi.

Sa  pag-abot niya sa  gawas nakit-an niini nga nagbuy-od na sa yuta ang biktima   nga nagkadugo.

Nangayo unta  dayon   siya  og tabang sa mga silingan ug gihatud   nila  kini  ngadto  sa Badian District  Hospital  diin  kini  ideklarar   nga  Dead on Arrival  (DOA). Ang kapolisan padayon pa sa ilang imbistigasyon pagtumbok sa ngalan  sa kriminal  kinsa  gituohan  sa  kapolisan  nga  naglagot  kay  basin nabiktima  kini  sa pagpanghasi  sa biktima.  (BANAT NEWS)