Bag-ong desinyo sa plaka sa sakyanan mogawas na
CEBU, Philippines - Posibleng sa Agusto o Septembre na ipagawas sa Land Transportation Office (LTO) ang bag-ong gidesinyo nga plaka alang sa tanang sakyanan.
Kini matud pa sa Department of Transportation and Communication (DOTC) Secretary Jun Abaya sa usa ka radio interview.
Sumala ni Abaya nga ila lang gihuman karon ang gitawag niya nga post qualification ug andam na nilang ipatrabaho sa mapili nilang shop nga modaug sa subasta.
Walo ka desinyo ang awtorisado karon nga nakahatag og kahasol sa mga traffic enforcer , sumala ni Abaya.
Una kining giplano nga ipatuman niining buwana apan tungod sa pipila ka aberiya, maoy hinungdan nga medyo nalangay ug unya na sunod buwan kini ikapatuman.
Giingon nga kining bag-o nga plaka maoy matawag nga standardized plate ug kargado og security feature.
Ang ilawom niini gidugangan og desinyo ug adto na kini itaud sa rehiyon nga unang rehistrohan sa sakyanan.
May slogan usab ang rota sa mga sakyanan nga iya sa goberno, sumala pa ni Abaya. (BANAT NEWS)
- Latest
