Cebu nangharos sa 2013 Nursing Licensure Examination

CEBU, Philippines - Ang 20-anyos nga Cebuana, Beverly Anne Balagon sa Velez College maoy nakakuha sa unang pwesto sa June 2013 Nursing Licensure Examination ug walo ka laing mga Cebuano nursing graduates ang mi-okupar usab sa top ten spots.

Si Balagon kinsa nakakuha og average nga 87 aron mabutang sa top spot miingon nga dili gyud siya makatuo nga nakuha niya ang maong pwesto kay ordinaryo ra kaayo ang iyang pag-graduate.

Apan matud ni Balagon, sa dihang naa pa siya sa iyang junior years sa college, usahay maapil siya sa dean’s list pero dili gyud permanente.

“I was not expecting that I would really bag the top spot, not this much. I reviewed not to the point na inaabuso ang katawan sa pagre-review. Though, like other examinees, I did wish to be in the top ten but I was not expecting that I would bag the top 1 spot,” matud ni Balagon.

Giangkon ni Balagon nga sa adlaw sa wala pa ang examination, miadto gyud siya sa Basilica Minore del Sto. Niño aron mangamuyo ug gisundan niya kini og pag-adto didto sa milagrosong Our Lady of Lindogon sa Simala, Sibonga, aron magpasalamat.

Matud ni Balagon, mas gusto niya nga anhi lang manarbaho sa Pilipinas nungka sa bang nasud.

Upat usab ka mga Velez graduates ang naa sa top ten nga mao sila si Romelyn Icot (ikaunom) 85.60; Nikki Nathasia Javier (ikapito) 85.40; samtang sila si Shiela Heruela ug Kyzia Ann Kintanar (ikanapulo) 84.80.

Tulo usab ka Cebu Normal University (CNU) graduates ug usa gikan sa Cebu Doctors University (CDU) ang nasulod usab sa top 10 nga mao sila si Sherry Mae Manzanares Ampil sa CNU ug Rejenne Gulfan Sotes sa CDU pulos nakakuha og 85.20.

Si Guada Fe Marie Jore Mercado ug Mariann Stephanie Brillantes Rosales, pulos gikan sa CNU, maoy ikasiyam sa average nga 85.

Matud pa sa Professional Regulation Commission (PRC) website 16,219 sa 37,887 nga mikuha og pasulit ang nakapasar sa Nursing Licensure Examination nga gihatag sa nagkadaiyang dapit sa nasud. (Marigold P. Lebumfacil/EIM)