P50 mil nasakiyo sa milungkab sa pharmacy

CEBU, Philippines - Mikapin  sa  P50 mil  nga kwarta ug mga tambal ang nasakiyo sa mga suspek nga milungkab sa usa ka pharmacy didto sa lungsod sa Argao   nga nadiskobrihan sa  alas 7:30 sa buntag niadtong Sabado.

Kini  dihang    nangabli  sa tindahan   ang mga kawani   alang sa naandan  nilang pamatigayon.

Ang nabiktima sa   maong  lungkab mao ang Pharmacia Vermicia nga nahimutang sa Kintanar St., Poblacion, Argao.

Gipanag-iya   kini  sa negosyante nga si Mr. Leo Yncierto, 50, minyo, ug nagpuyo ra usab sa maong lugar.

Ang mga nahanaw nga butang naglangkob sa kwarta nga P32 mil isip  halin,  ug  mga baligya  nga sama sa assorted milk,  nga  mikantidad og P10 mil. Nahilakip  usab  ang  2 ka cell phone nga mokantidad og P3 mil,  ug mga lain- laing klase sa tambal nga mokantidad og P2 mil.

Ang mga kawatan nga nakuha sa CCTV camera nag- brief lang kini nga misud sa maong pharmacy ug naghukas sa ilang senina nga giputos sa ilang nawong ug mata lang ang gipagimaw aron dili mailhan.

Si PO2 Jamal Kiri Camarino sa Argao Police  Station mibutyag  sa  Banat News   nga ang plywood nga  bungbong sa maong pharmacy,  gilungagan  ug didto moagi paingon sa sulod  sa tindahan ang mga kawatan.

Pag-abot sa sulod, gipanghipos ang nahisgutang mga butang apil na ang P32 mil  nga halin   gikan  sa hunos.

Gituohan nga nianang kaadlawon   gihimo  ang  maong  pagpanglungkab atol sa pagbunok sa  kusog nga  uwan.

Pagpangabli  na  sa  mga  kawani  nianang pagkabuntag  nadiskobrihan   ang  maong  hitabo.

Ang kapolisan padayon pa  nga  nag-imbistigar  pinaagi  sa  pag-review sa   agi  sa CCTV camera aron mailhan ang   mga     kawatan. (BANAT NEWS)