Naguol kay di pangasaw-on naghikog

CEBU, Philippines - Naghikog patay ang 20 anyos nga dalaga  kinsa unom ka bulan  nga nagsabak  human niini masayri nga naglikay-likay na  kaniya  ang iyang uyab didto sa Upper Candabong, barangay Binlod, lungsod sa Argao niadtong Sabado sa alas 5:20 sa hapon.

Ang nagpakamatay mao si Vanessa Bioton, 20 anyos, dalaga, bag-ohay lang migraduwar sa kursong Hotel and Restaurant  Management (HRM) sa Cebu Technological University (CTU) sa lungsod sa Argao, ug  nagpuyo sa maong lugar.

Si PO2 Jamal Kiri Camarino sa Argao Police  Station mibutyag  sa Banat News  nga si Myrna Biolon,hingkod,  iyaan  sa biktima  nagkanayon  nga  gikan siya sa uma niadtong tungora ug pag-uli niya sa  ilang   balay nakugang nalang kini kay naka-lock ang pultahan sa atubangan   ug ang pultahan sa kusina sa ilang  balay.

Gumikan  niini  iyang  gipugos  ang pagguba sa pultahan aron gyud kini ma -abli.

Apan  misamot  ang  iyang  kakurat dihang  maoy misugat  sa iyang  mga  mata   ang  iyang pag-umangkon nga nagbitay sa  sala,  diin  ang pisi gihikot   sa  liog ug nakabaat ang tumoy niini sa kisame,  ug wala nay panimuot.

Dali kining nangayo  og  tabang sa mga silingan ug sa ilang  pagtangtang sa pisi sa liog,  nasuta nga patay na kini.

Ang kabanay niini nagtuo nga naghikog gyud ang  dalaga  nga maoy nakaingon sa iyang hinanali nga kamatayon.

Samtang  dugang nahipos nga impormasyon sa kapolisan nga   nagsabak  og  unom ka bulan ang dalaga kansang  uyab  giingong   wala  na magtagad kaniya.

Tungod  kay  nagtuo nga  dili  na  kini  mangasawa  kaniya, naguol  ang  dalaga nga  maoy  gituohang  hinungdan  sa pagpakamatay  niini. (BANAT NEWS)