Venray, RAFI ug DSWD7 naghiusa para kabus

CEBU, Philippines - Pinaagi sa Sustainable Livelihood Program (SLP) sa Department of Social Welfare and Development (DSWD-7), usa ka Memorandum of Agreement (MOA) ang gipirmahan tali sa Venray Construction ug Ramon Aboitiz Foundation Inc. (RAFI) Micro-Finance ug sa DSWD-7.

Atol sa hamubong seremonya nga gipahigayon didto sa buhatan sa DSWD-7, gipangunahan ni DSWD-7 Regional Director Mercedita P. Jabagat ang maong pagpirma sa MOA.

“Having this MOA means having new strategic partners in implementing anti-poverty projects and programs of the agency,” kini matud pa ni Jabagat.

Samtang  sa bahin ni Kerwin Macopia sa DSWD-7 kini  nagkanayon nga ang Venray Construction nagtinguha sa paghatag og kahigayonan sa trabaho ug usab gikinahanglang mga pagbansay-bansay  sa mga benepisyaryo sa programa sa DSWD alang sa kausbawan sa ilang tagsa-tagsa ka abilidad.

Dugang pa ni Macopia nga ang maong pagpakig-alayon sa Venray giumol isip usa ka output sa Contractors' Forum nga gipahigayon sa miaging Mayo 18 ning tuiga diin ang mga kanhing trabahante sa "Trabahong Lansangan Program" nga usa ka partnership program tali sa DSWD ug Department of Public Works and Highways (DPWH) kahatagan og prayoridad lakip na ang mga benepisyaryo sa Pantawid Pamilya.

Samtang sumala pa ni Macopia nga  ang RAFI Micro-Finance mohatag usab og credit assistance nga 3 porsyento lamang nga rate matag bulan ngadto sa mga benepisyaryo sa maong programa aron sila makasustener sa ilang panginabuhian ug nga makaapil sila sa micro-enterprise.

Gibutyag ni Macopia nga sama sa Pantawid Pamilya Pilipino Program ug Kapit-bisig Laban sa Kahirapan- Community Integrated Delivery of Social Services (KALAHI-CIDSS), ang SLP parte usab sa  Convergence Strategy sa DSWD-7 alang sa pagpaminus sa kakabos diin usa kini ka community-based capacity-building program nga nagtinguha sa pagpausbaw sa socio-economic status sa mga partisipante. (/WC) (BANAT NEWS)