Alcala mibubo og P3.5 milyones nga proyekto sa Sugbo
CEBU, Philippines - Dul-an sa P3.5 milyones nga kantidad sa proyekto ang gipang-apod-apod ni Department of Agriculture (DA) Secretary Proceso J. Alcala ngadto sa mga mag-uuma ug mga rural organizations sa syudad sa Sugbo.
Kini atol sa bag-ohay pa lamang niyang pagbisita dinhi agi og pagpadasig sa mga Sugbuanong mag-uuma.
Ang maong mga proyekto naglangkob sa 40 ka indibidwal nga insurance package nga naglakip sa accident, dismemberment ug usab burial .
Gani ang katibuk-ang kantidad mikabat sa P2.2 milyones nga naglakip usab sa mga kabaw ug daro nga gipanghatag ngadto sa 18 ka rural organizations.
Lakip usab niini ang mga barangay nga Malubog ug Bonbon nga may kantidad nga mikabat sa P840,000.
Gawas niini nang-apod-apod usab og mga plastic drums si Alcala nga nagkantidad og P36,000 ngadto sa mga mag-uuma ug youth organizations. Nanghatag usab siya og knapsack sprayers, mga utanon ug usab ornamental nga tanom ngadto sa 10 ka mga organisasyon sa mango growers diin gibana-banang nagkantidad kini og P22,500.
Lakip nga iyang gihatag ang mga hose sa tubig nga nagkantidad og P74,500 alang sa 18 ka asosasyon sa mga mag-uuma lakip na ang Cambinocot ug Tiguib-Malubog Multi Purpose Cooperatives. Nahilakip usab sa maong mga gipanghatag mao ang tractor nga nagkantidad og P118,000; seedlings sa lubi nga nagkantidad og P3,876 ug usab nagkadaiyang livelihood projects nga nagkantidad og P100,000.
Sa laing bahin gipadayag ni DA 7 Regional Director Angel Enriquez nga ang hands-on training alang sa organic agriculture ipahigayon unya ngadto sa mga barangay sa syudad sa Sugbo aron mahatagan ang mga kabatan-onan og kaalam mahitungod sa environmental friendly farming.(/WC) (BANAT NEWS)
- Latest
