2 ka drug addict tiklo

CEBU, Philippines - Nasikop sa  mga  sakop sa  City Intelligence Bureau (CIB) sa Mandaue City Police Office (MCPO)  ang  duha  ka mga lalaki  nga nagsuyop og shabu  didto  sa sitio Sun Flower  sa   barangay Zone 3, dakbayan  sa   Mandaue alas 11:00 pasado ang takna sa miaging gabii.

Ang nadakpan mao sila si Bimbo Lim Tecson, 35, ulitawo  nga nagpailang pastor sa simbahan  ug Marcelo  Guilina Ocalang alyas Otoy, 40, minyo, nga pulos taga sitio Camagayan sa barangay Cubacub sa maong dakbayan.

Ang ikatulo nga nailhan lang nga usa ka Ayban Tecson, hingkod, nga silingan  sa duha, nakahigayon sa pagdagan   ug wala  nila maapsi sa ilang ginukdanay.

Nunot sa pagkasikop sa  duha  nasakmit usab  ang duha ka dagkong pakete sa shabu ug mga kahimanan  sa pagsuyop niini.

Si  PO2 Julius  Ceasar Tampus sa CIB  sa maong dakbayan nga nahinabi sa Banat News miingon nga ang ilang buhatan    sa sayo  pa, nakadawat og taho gikan sa usa ka nagpakabanang molupyo sa maong dapit.

Dali nila  kining gisusi  ug ang tulo ka mga lalaki ilang naabtan sa akto   nga  nagsuyop og shabu   busa  ila  dayong gisikop .

Si SPO2 Temoteo Quirol maoy nangulo sa maong operasyon ug kauban niini sila si  PO3 Bejie Abapo, PO2 Dexter Isles, PO2 Julius Tapana ug PO2  Tampus ug  miingon  nga ang duha ka dinakpan maoy  ilang unang nagunitan.

Samtang   si Ayvan nga wala maguniti ang nakaeskapo ug wala na maapsi sa ilang ginukdanay.

Dugang pa ni PO2 Tampus nga misukol unta kanila ang duha pinaagi sa pagkisikisi ug pagpamatid nga maoy hinungdan nga ilang gigamitan og kusog hangtod nga ilang naposasan.

Mikagulkol  na  sa prisohan ang  duha samtang  gihikay na ang  tukmang  kaso  batok kanila.(/WC) (BANAT NEWS)