Lawak-saringan sa Mandaue City public schools nagkuwang gihapon

CEBU, Philippines - Bisan sa mga bag-ong gitukod nga mga edipisyo alang sa mga public schools sa siyudad sa Mandaue, nagkulang gihapon ang mga lawak saringan aron kasudlan sa mga tinun-an.

Sa pagkakaron, nagsinardinas ang mga public schools sa siyudad.

Si Engineer Cielo Jamora nga maoy physical facility coordinator sa Department of Education (DepEd) sa Mandaue City  mibutyag nga  dunay 22 ka mga high schools ug 27 ka elementary sa nagkadaiyang kabarangayan sa siyudad.

Usa sa mga nagdasok karon mao ang Maguikay Elementary School ug sa Mandaue City Comprehensive National High School sa barangay Centro sa maong dakbayan.

Si Jamora miingon nga human sa ilang pag-ihap sa populasyon sa mga tinun-an sa public schools niadtong Hunyo 28 ilang nahibaw-an nga kuwang ra gyud ang mga lawak-saringan tungod sa pagdaghan sa mga tinun-an kun itandi sa tuig 2012 ug karong tuiga.

Sa miaging 2012 ang 40,227 ka tinun-an sa elementarya ang natala apan misaka kini ngadto sa 40,515 karong tuiga. Samtang sa high school, 18,495 ka mga tinun-an karong tuiga mokabat na kini sa 18,561 karong tuiga.

Dugang pa niya nga nagpadayon na hinuon ang kaugmaran sa dugang lawak saringan diha sa Canduman sa elementary ug sekondarya nga adunay tulo ka andana ug ingon man sa Mandaue City Comprehensive  National High school, Basak Elementary School. Canduman National High  School, Tabok National High School, Labogon National High School ug daghan pa. (Romeo T.  Limpangog/EIM) (BANAT NEWS)