Siyam ka mga gradwado sa Sibonga Community College nakapasar sa LET
CEBU, Philippines - Siyam ka mga migradwar gikan sa Sibonga Community College ang mipasar sa Licensure Examinations for Teachers (LET) nga gipahigayon sa Professional Regulatory Board (PRC) niadtong buwan sa Marso niining tuiga.
Si Sibonga Mayor Lionel Bacaltos mibutyag nga ang mga board passers sa elementary mao si Meriam Balbotin, Jennifer Banlasan, Anna Bella Laude ug Leilani Temeña.
Samtang ang mga board passer sa high school mao si Jolly Ann Kilantang, Maria Lourdes Rizada, Crisel Milagrosa, Bevelinda Reytomas ug Lina Soco.
Si kanhi Kongresista Eduardo Gullas ug Bacaltos nagkanayon nga ang community college padayong naninguha alang sa maayong performance ratings.
“The Sibonga Community College was crafted into what it is now, a destiny of education oasis to students in search for life-living knowledgeâ€, ni Gullas pa. Ang tuition fee sa community college P2,900 lang matag semester ug sa maong ubos nga tuition fee ang labing dunay gamay kaayong income nga pamilya makaabot sa pagpa-enroll sa ilang anak ngadto sa kursong gitanyag sa tunghaan, matud pang Bacaltos.
Ang gipangtanyag nga kurso sa community college mao ang elementary ug high school education, Bachelor of Arts in Business Administration ug two-year nga Information Technology.
Si Bacaltos nagkanayon nga ang tumong sa pagpatukod niya og community college sa iyang lungsod aron matabangan ang mga batan-on ilabi na kadtong mga nagpuyo sa bukirang mga barangay nga makatungha sa kolehiyo.
Ang mayor midugang nga sa ilang lungsod kasagarang panginabuhian mao lang ang panguma ug 30 porsyento lang sa migradwar sa high school ang makatungtong sa kolehiyo.
Ang Sibonga Community College na-establisar kini ni Gullas niadtong tuig 2008. (BANAT NEWS)
- Latest
