2 nasikop nga may shabu ug kutsilyo

CEBU, Philippines - Nagtingkagol sa karsel ang duha ka lalaki    human  kini  makuhai  og gidiling  drugas  ug kutsilyo atol sa  checkpoint sa  Fuente Police  sa dalan Osmeña Boulevard, sa  Barangay Camputhaw, dakbayan sa Sugbo  kagahapon  sa gabii.

Ang mga nasikop mao sila  si  Rey Labajo, 34, giingong negosyanti og barbeque, ug Jhoanry  Paderna, 30, nga usa usab ka   drayber  sa habal-habal, ug managsilingan  ra  sa  barangay Lahug.

Sa pakighinabi sa Banat News ni PO3 Atilano Perolino sa Fuente Police Station, mipadayag kini nga  sa ilang checkpoint sa nahisgutang lugar, ilang nasuta   ang mga kadudahang lihok   sa  duruha.

Hinungdan  nga ila kining gipahunong aron sutaon  ug  dihang miisa na sa mga kamot si Labajo giingong nahulog niini ang usa  ka gamay’ng  botelya nga adunay  sulod nga unom ka gituohang paketi sa shabu nga nagkantidad og P1,200.

Dugang pa ni Perolino nga gawas sa shabu ila usab nga  nakuha ang usa ka gamay’ng kutsilyo nga maoy ilang gidudahang gamiton sa binuang.

Matud pa ni Perolino nga ila pang sutaon kun aduna bay record ang duruha sa ilang area of responsibility ug sa uban pang lugar. Usa sa gidudahan sa kapolisan mao nga mga tulisan ang ilang nasikop  kay  nagbitbit  man  kini  og hait nga hinagiban.

Samtang sa pakighinabi kang Labajo, miangkon kini nga iya ang maong  paketi sa shabu apan miingon  nga personal  kini  nga iyang  gamiton ug dili  baligya.

Dugang pa ni Labajo nga iya lamang nga gi-hire si Paderna aron mo-drive kaniya paingon  sa Carbon ug  sa ubang  dapit  nga palitanan  niya  og puso. (BANAT NEWS)