Senior citizens gialam-alaman sa OSCA
CEBU, Philippines - Gialam-alaman sa hepe sa Cebu City Office of Senior Citizens Affairs (OSCA) ang mga senior nga nagtoo gyud nga makadawat na usab sila og cash assistance gikan sa dakbayan sa Sugbo karong buwana.
Matud ni OSCA head Rolando “Dodong†Llaguno nga ang pagpanghatag sa cash assistance ngadto sa mga senior citizens mag-agad kun adunay igo nga pundo ang dakbayan sa Sugbo.
Gipasabot ni Llaguno ang mga senior nga makaayo usab kanila kun iangan-angan lang ang pagdawat sa cash assistance gikan sa dakbayan kay modako ang ilang makobra.
Ang matag usa sa mga 60,000 ka senior citizens dinhi sa dakbayan makadawat pa og dugang P6,000 hangtud sa Disyembre kay ang pasiuna nga P4,000 ila na man nga nadawat kaniadtong Marso 25 ug 26.
Ang Cebu City Council mihimo og ordinansa nga ang paghatag sa cash assistance sa mga senior himuon unta matag buwan apan wala kini toohi ni Mayor Michael Rama.
Matud ni Llaguno nga kun ang cash assistance unya na ihatag sa Septiyembre mahimong tag P3,000 na ang ilang madawat ug ang laing P3,000 adto na usab makobra sa Disyembre.
Gibutyag ni Llaguno nga tangtangon gyud nila sa lista sa makadawat og cash assistance gikan sa City Hall kadtong miangkon nga taga Sitio Maaslum apan diay tua magpuyo sa Mandaue. (BANAT NEWS)
- Latest
