P48 mil gisakiyo sa 2 ka tulisan
CEBU, Philippines - Mikabat sa P48 mil ang nasakiyo sa duha ka armadong lalaki kinsa pulos nagtaptap sa ilang mga nawong, ang negosyante og baboy samtang paingon unta kining mangompra didto sa Sitio Ylaya, barangay Panalipan, lungsod sa Catmon niadtong Lunes sa ala 1:00 sa hapon.
Ang biktima mao si Ederlito Arija, 28, minyo, nagpuyo sa Highway Looc, siyudad sa Danao ug mangomprahay og baboy ang negosyo.
Duha ka mga batan-ong lalaki nga wala hiilhi, pulos nagtaptap sa ilang nawong ang gitumbok nga responsabli.
Si SPO2 Rex Menchavez sa Catmon Police Station mibutyag sa Banat News nga ang biktima miadto sa maong lugar sakay sa iyang motorsiklo kay may nagpahibawo kaniya nga adunay ibaligya nga baboy sa maong dapit.
Apan dihang paingon na siyang mopauli, pag-abot sa maong lugar giatangan kini sa duha ka tulisan nga armado ug gipahunong dayon mideklarar nga tulis.
Way nahimo ang biktima kay gipugos og kuha sa mga suspek ang iyang bag nga adunay sulod nga P48 mil.
Ang maong kuwarta maoy silbi niyang puhonan sa pagpangompra og baboy.
Apan nagduda ang kapulisan sa aligasyon sa biktima tungod kay duol ra sa outpost sa kapolisan ang lugar nga nahitaboan ug walay nakamatngon sa maong hitabo. Sa pagkakaron padayon pang gisuta sa kapolisan ang maong hitabo. (BANAT NEWS)
- Latest
