Lalaki gi-salvage patay

CEBU, Philippines - Nagsugod na og kadugta ang patay’ng lawas sa usa ka lalaki nga giingong gigapos ang duha ka tiil ug dunay buslot sa ulo nga gidudahang samad pinusilan dihang nadiskubrehan daplin sa sapa ilawom sa taytayan sa Sityo Abuno barangay Valencia sa siyudad sa Carcar niadtong Lunes sa alas 6:00 sa gabii.

Ang biktima giila sa iyang asawa nga si Nelson Racho, 46, nagpuyo sa Sityo Upper Taog barangay Valladolid siyudad sa Carcar. Matud ni PO2 Abelardo Beton sa Carcar City Police Station dihang nahinabi sa Banat News ang mga molupyo sa maong lugar maoy nakadiskobre sa patay’ng lawas ug daling gipahibawo sa ilang buhatan.

Sa pagresponde sa kapulisan naabtan didto nga niaksyon na og kadugta ang patay’ng lawas sa biktima.

Subay sa gihimong pagsukitsukit sa kapulisan sa asawa nga si Chona Racho gitug-an niini nga petsa 27 sa Hunyo pa nilakaw sa ilang balay ang biktima ug wala na kini makauli hinungdan nga iyahang gipa-blotter sa buhatan sa kapulisan sa pagka petsa 28.

Matud sa asawa nilakaw sa ilang balay ang biktima aron unta sa pagpanguha og bunga sa kahoy nga maoy ipakaon o ipurga sa mga manok igtatari aron iyaha kining ibaligya.

Si SPO3 Jorame Tanudtanud, imbestigador sa maong kaso, mibutyag nga dihay mga bata nga nanakop og uwang sa sapa nga maoy nakakita sa migimaw nga kamot sa biktima.

Gipalawman karun sa kapulisan ang imbestigasyon pagtino kun dili ba kini usa ka kaso sa salvaging ug gilabay ra sa maong lugar ang patay’ng lawas sa biktima. (BANAT NEWS)