Truck boy gipusil sa hawak bala milapos sa sampot

CEBU, Philippines - Talandugon ang kahimtang sa usa ka truck boy human kini pusila sa hawak apan milapos ang bala sa iyang  sampot  samtang kini nagbarug  nga nakig-estorya sa iyang amigo ug mga kauban sa trabaho didto sa Purok Carot-Dapdap, barangay Catarman sa lungsod sa Liloan kagahapon sa alas 3:30 sa kaadlawon.

Ang biktima  giila  lang  nga si Impang Canete, 19, ulitawo, ug  lumad  nga  taga Baybay, Leyte apan temporaryong nagpuyo sa Subangdaku,  siyudad sa Mandaue.

Ang  iyang  panginabuhi  mao  ang  pagtrabaho  isip truck boy  sa Heltrans Trucking Services  sa maong  lugar.

Ang   kriminal  giingong  nagbinugtong lang  nga   nagsakay og motorsiklo apan wala makuha  ang plate number niini.

Si PO3 Jason Gayo sa Liloan Police   Station mibutyag  sa Banat News   nga  ang biktima  samtang nagbarug  nga nakig-estorya sa iyang mga barkada ug kauban sa trabaho,  kalit lang   miabot ang   kriminal.

Diha-diha, wala’y daghang pangutana gilanit dayon  niini  ang  iyang  armas  de fuego   ug gipusil ang biktima.

Gumikan  kay  milihay,  hawak  niini  ang  nasabak  apan ang bala  milapos sa iyang lubot.

Ang suspek dali kaayong  mipasirit  og  padagan  sa iyang  motorsiklo  human sa hitabo, samtang ang biktima gilahos og dala sa Vicente Sotto Memorial Medical Center (VSMMC) sa dakbayan  sa Sugbo.

Ang  kapolisan  mitutok  sa anggolo  nga  pagkasuya  lang  ang  hinungdan  sa maong  pagpamusil.

Apan  padayon  pa nilang  giimbistigar  aron  matumbok  ang  kriminal  sa maong  hitabo. WC (BANAT NEWS)