MV Ming Yuan nakabiya na sa Sugbu padung China

CEBU, Philippines - Nakagawas na gyud sa kadagatan sa Pilipinas kagahapon ang Chinese-flagged bulk carrier M/V Ming Yuan, human sa kapin sa buwan nga pagkatanggong dinhi sa baybayon sa Sugbo.

Ang maong Hong Kong-registered vessel nga adunay 24 ka mga crew  mogawas na unta niadtong miaging Sabado apan nakanselar kini tungod sa kakusog sa bagyong Gorio, nga miigo sa amihanang lugar sa Sugbo.

Ang maong barko gi-angkorahe sa Tapilon Point, diin mahimutang ang detachment sa Philippine Coast Guard (PCG) Central Visayas ug tungod sa kabati sa panahon, wala tuguti sa mga personnel sa PCG ang paglarga sa barko.

Kahinumduman nga ang maong barko na-stranded sa Malapascua Island niadtong Mayo 19 ug human makadawat sa mga reklamo sa mga local executives sa isla, nasuta sa tulo ka mga maritime agencies nga wala kini mananghid kanila.

Tungod sa kadaghan sa mga violations sa maong barko ngadto sa Bureau of Customs, Bureau of Immigration and the Bureau of Quarantine atol sa initial inspection nga ilang gihimo duha ka semana na ang milabay gipamulta ang maong barko og kapin sa usa ka milyon ka pesos. EIM (BANAT NEWS)