Kanhi sikyu gipusil patay sa iyang pag-umangkon

CEBU, Philippines - Gipusil patay ang usa ka retiradong gwardiya sa iyang kaugalingong pag-umangkon nga iyang gikulata samtang kini nangahoy didto sa Giunsay Cogon siyudad sa Danao kagahapon sa alas 8:00 pasado sa buntag.

Ang biktima nga wala na madala pa sa tambalanan mao si Venancio Avila, 59, nagpuyo sa Sityo Tabuk Kamalig Danao City ug retiradong gwardiya.

Samtang ang suspetsado sa krimen mao ang iyang pag-umangkon nga si Danilo Batulan,35, taga Guinsay Danao City.

Matud ni PO2 John Bensi sa Danao City Police dihang nahinabi sa Banat News miingon nga dugay nang magkaaway ang duha ug niadto lang adlaw nga Biyernes subling gikulata sa biktima ang suspek.

Tungod sa kalagot sa suspek, giapas niini ang biktima nga nangahoy diha sa kalibunan ug didto iyaha kining gipusil sa walang bahin sa dughan.

Dihang nahagba na ang biktima dali sab kaayung nakabiya pahilayo ang suspek ug ang mga polis nga miresponde sa alarma nakadiskubre og duha ka kabhang sa kalibre .38 nga armas nga gituohang gikan sa armas sa suspek.

Sa pagsusi sa biktima patay na kini ug wala nalang dad-a sa tambalanan. Samtang sa pagka alas 9:25 sa buntag nipatim-aw usab sa buhatan sa kapulisan ang suspek aron pagtahan sa iyang kaugalingon. (BANAT NEWS)