Sibyaanan sa Toledo City gibuksan pagbalik ni Mayor Sonny O.
CEBU, Philippines - Gipaablihan pagbalik ni Toledo City Mayor John Henry “Sonny†Osmeña ang usa ka estasyonan sa radio nga FM sa maong syudad pinaagi sa paglibkas sa cease and desist order nga giluwatan ni kanhi mayor Aurelio Espinosa human siya makahural kagahapon sa sala ni RTC Judge Albei Carmelo Pescadero.
Gikan sa korte, nidiretso si Osmeña sa buhatan sa Bay Station nga gipanag-iya sa taga dakbayan sa Makati nga si Ernesto Yabut aron libkason ang kamandoan ni Espinosa niadtong Disyembre 21.
Matud pa ni Osmeña nga biktima lang sa pamolitika ang maong estasyonan sa radio.
Sayo niini gihulagway ni Osmeña nga Martial Law ang gihimo ni Espinosa sanglit wala siya’y gahom niini gawas lang sa National Telecommunications Commission (NTC).
Ang beteranong magsisibya nga si Fernando “Nanding†Celestial adunay programa sa maong estasyonan sukad pa niadtong Mayo 2012 nga nagbulgar sa giingong mga anomaliya ni Espinosa.
Samtang gipahural ni Osmeña ang kaubanang opisyal nga midaug sa niaging eleksiyon nga si Bise Mayor Antonio Yapha Jr.ug siyam ka konsehal nga kasagaran mga sakop sa One Cebu Party.
Si Osmeña ug Yapha ug tulo ka konsehal nga nidaug mga sakop sa Liberal Party.
Ang nabilanggo nga si konsehal Ricardo Rafols sakop usab sa LP ug giingong nakapanumpa na didto sa Manila sumala pa sa iyang igsoon nga si Riza. Si Rafols anaa pa sa National Bilibid Prison sa dakbayan sa Muntinlupa sukad Agosto sa niaging tuig human siya nahukman sa Sandiganbayan nga mabilanggo sa tibuok kinabuhi gumikan sa giingong pagpangawkaw og mga butang sa gobiyerno niadtong 2001 samtang siya ang bise mayor. (BANAT NEWS)
- Latest
