Gay bar gipasirad-an
CEBU, Philippines - Gikandadohan sa mga sakop sa Cebu City Anti-Indecency Board (CAIB) ang usa ka bar nga pundokanan sa mga mahuyang ug mga matrona diha sa Barangay Banilad.
Si Mayor Michael Rama mihatag og pagtugot sa mga sakop sa CAIB nga gipangulohan ni Dr. Lucille Mercado nga sirad-an ang Cheetah Bar & Restaurant kay nagpasalida kini og law-ay nga talan-awon.
Nasakpan kaduha ka higayon sa mga sakop sa CAIB nga ang mga lalaki nga dancer sa maong bar nagpasundayag og law-ay nga sayaw pinaagi sa pagpakita sa ilang kinatawo ug ipahikap pa gani kini bugti sa bayad kanila.
Duha ka babaye nga sakop sa CAIB ang nakakita gyud ug mao nga gipatubag nila ang tagdumala sa bar nga si Grace Gabasa apan wala gyud kini motubag.
Matud ni Mercado nga sinsero sila sa pagtak-op sa mga balay-kalingawan nga magpasundayag og law-ay nga mga talan-awon. (/EIM) (BANAT NEWS)
- Latest
