Gullas nangayo’g pasaylo sa iyang mga kauban

CEBU, Philippines - Si outgoing Cebu first district Representative Eduardo Gullas nangayo og pasaylo sa iyang  mga kaalyado sa Alayon sa pagkapildi niya sa milabay’ng eleksiyon sa iyang pagkandidato isip mayor sa dakbayan sa Talisay.

Ang maong pagpangayo og pasaylo ni Gullas gihimo atol  sa gipahigayong mass oath taking ceremony sa mga bag-ong napiling opisyal sa unang distrito nga kaalyado sa Alayon.

Mikabat  sa 48 ka mga membro sa Alayon gikan sa dakbayan sa Talisay, Minglanilla, Naga, San Fernando, Carcar ug Sibonga ang gipapanumpa ni Gullas  kagahapon. Si Gullas sa iyang mensahe milakbit kini sa iyang pagkapildi batok sa iyang kaatbang nga si Johnny Delos Reyes ubos sa 736 nga botos.

Apan bisan supak sa kabubot-on sa iyang mga abogado mi-concede siya.

Sa pagkakaron si Gullas wala pa  mohatag og pamahayag  bahin sa iyang plano sa umaabot nga tuig  2016.

Apan giawhag niya ang iyang mga kaalyado nga palig-onon ang ilang organizational structure sa tibuok distrito.

Ang grupo sa Alayon mao gihapon ang nagdominar sa tibuok unang distrito diin upat ka napiling mayor sa distrito kaalyado sa Alayon.

Sa dakbayan sa Talisay ug San Fernando ang Alayon nangapildi  usab . Sa dakbayan sa Talisay ang Alayon maoy naghupot sa majority sa konseho sa siyudad.

Si Gullas kinsa last termer na  sa posisyon  gihulipan   sa iyang apo nga si Gerald Anthony “Samsam” Gullas  kinsa  midaog  isip kongresista  sa unang  distrito  sa lalawigan.

Si Samsam miawhag sa ilang mga kaalyado nga mosuporta ug motabang  kaniya  alang  sa kaayohan  sa  unang distrito. (BANAT NEWS)